Cristóbal Medeiros: «Eu non vexo o sindicalismo que se move entre catro paredes, temos que volver á rúa»

O novo secretario xeral de UGT-Galicia, Cristóbal Medeiros (Seo de Urgel, Lérida, 1986) exerce dende o 2006 como bombeiro forestal da BRIT de Laza. Empezou contratado no servizo como peón de caza e só por 3 meses, algo que o empuxou a entrar no sindicalismo para mellorar as condicións laborais.

—Por que dá agora este paso? Que foi o que o animou?

—O primeiro é que me gusta o mundo do sindicalismo, axudar aos traballadores na mellora das condicións laborais, e ocorre tamén que me pediron que dera o paso dous secretarios xerais das federacións en Galicia, a de servizos públicos e a de industria. E valorei que ou o facía agora, con 38 anos, que me sinto con gañas e enerxía, ou xa o non o facía nunca. E aquí estou.

—E como pretende recuperar a hexemonía sindical perdida?

—Pois traballando moito, e sabendo que a militancia sindical baixou con respecto a outras épocas. A receita consiste en innovar, en facer un sindicalismo máis áxil e práctico que dea as respostas axeitadas ás prioridades da xente. Eu non vexo ese sindicalismo que se move entre catro paredes, temos que volver á rúa.

—Como se cura agora a fractura interna amosada no congreso con dúas candidaturas?

—Igual de cara a fóra parece unha fenda, pero foi un congreso moi emotivo, coa particularidade de que había que relevar a unha persoa que levaba 20 anos e había dúas ideas, pero no fondo os dous queremos o mesmo, e seguiremos remando cada un dende o seu posto.

—Haberá colaboración?

—E que non entendendo o sindicalismo doutra maneira, haberá colaboración con Ángel Iglesias e con todas federacións e unións comarcais. Somos unha organización, non o exército de Pancho Villa.

—Cómo van a ser as relacións co goberno da Xunta?

—Gustaríame manter un talante colaborativo, sabendo o papel que ten que desempeñar cada quen. UXT somos una forza importante en canto a representación laboral e penso que estamos condenados, non sei se a entendernos coa Administración galega, pero si a dialogar e intentar chegar a acordos.

—Algún asunto polo que lle gustaría abrir ese diálogo?

—Hai varios, dende a situación do medio rural, que necesitamos darlle un pulo para deter o seu abandono e despoboamento, e tamén a crise xerada pola falta de vivenda. Váleme empezar por calquera cousa, traballo non falta se hai vontade.

—Falou de apoiar unha industria estratéxica para Galicia, e o líder nacional de UXT, Pepe Álvarez, xa deslizou que Altri, de entrada, non. Que opinión ten vostede?

— O que dixo Pepe Álvarez é que non temos que pensar en proxectos industriais de dubidosa calidade ambiental, senón en industrias sostibles que xeren emprego e riqueza. Eu traballo como bombeiro forestal e vexo os efectos do cambio climático no medio. Temos que ser responsables.

---

---

---