A mecha que provocou o incendio foi un atentado terrorista
07 may 2014 . Actualizado a las 12:24 h.O próximo 28 de xuño cúmprese o primeiro centenario do atentado que sufriron en Saraievo os herdeiros do Imperio austro-húngaro, o arquiduque Francisco Fernando e a súa esposa Sofía. Estaban nunha visita oficial a Serbia cando un grupo terrorista pertencente á organización clandestina Man Negra atentou contra a comitiva. Os arquiduques viaxaban en coche descuberto para poder coñecer mellor a cidade. Os terroristas lanzaron unha bomba contra o coche, pero o propio Francisco Fernando tivo os reflexos de recollela e lanzala cara atrás. A explosión causou varios feridos, pero os arquiduques resultaron ilesos. Con todo, Francisco Fernando, despois de refuxiarse no Concello e de suspender os actos oficiais programados, decidiu dirixirse ao hospital onde se estaba atendendo aos feridos para interesarse por eles. No camiño o coche perdeuse e tivo que retroceder. Foi entón cando un dos membros do grupo terrorista, Gavrilo Princip, viulles, aproveitou a situación e disparou dúas balas que provocaron a morte de Francisco Fernando e de Sofía. Toda esta estraña sucesión de acontecementos pareceron demostrar, polo menos, unha moi deficiente organización da seguridade en torno ao herdeiro. Por iso o Goberno de Viena acusou directamente a Serbia da súa morte.
Aínda que efectivamente a guerra tardou formalmente en estalar algúns días, porque houbo ultimatos e prazos, iso foi a faísca que provocou un incendio de colosais dimensións. As alianzas e as ganas de desquite foron levando a unha nación tras outra a irse declarando a guerra coma se se tratase de fichas dun tráxico dominó. Ninguén foi capaz de pór cordura e deter o estalido da conflagración máis grave da historia da humanidade ata aquel momento.
A Primeira Guerra Mundial na web de Prensa-Escuela
A web de Prensa-Escuela, na súa sección e-studo de noticias, trata este tema dunha forma ampla e aplicada directamente á didáctica no titulado «Centenario de la Gran Guerra», que se pode descargar desde http://www.prensaescuela.es/web/lecciones/index.php. A guerra de 1914-18, chamada unhas veces a Gran Guerra ou Primeira Guerra Mundial, cambiou para sempre a historia do mundo e singularmente a historia de Europa. Un acontecemento de semellante magnitude pode ser estudado desde moi diversos puntos de vista que na web foron desenvolvidos.