O deseño do artista Borja Guerreiro presentouse este venres
21 jun 2025 . Actualizado a las 05:00 h.Unha imaxe moi representativa da historia de Cariño, unha sardiña en lata, dá vida ao cartel da edición 47 da Mostra de Teatro Galego. É obra do artista Borja Guerreiro «e transmite moi ben o que é Cariño», subliñou Laura García, concelleira de Cultura, na presentación.
Tamén estaban o autor do cartel, a alcaldesa, Ana María López; o director da Axencia Galega das Industrias Culturais (Agadic), Jacobo Sutil; e a deputada de Plans Provinciais e Asistencia a Municipios, Cristina García. A mostra, das máis veteranas de Galicia, celebrarase do 3 ao 9 de agosto.
Non desvelaron o programa, pero si adiantaron unha das novidades deste ano, a representación da obra Ás 12, creada polo grupo de teatro de actividades extraescolares do Concello, xusto antes do inicio oficial da Mostra. Pepablo Patiño, recoñecido actor e membro da compañía Ghazafelhos, dirixe a montaxe desta peza, cun grupo que debutará este ano.
Sutil agradeceu ao Concello que «manteña unha proposta cultural cunha calidade indiscutible» e a rexedora subliñou «a calidade da programación, para todos os públicos».