O evento reunirá a unha trintena de postos
01 abr 2025 . Actualizado a las 05:00 h.A concelleira de Feiras e Mercados de Narón, Mar Gómez, presentou onte a décimo cuarta edición da Feira Multisectorial Agrícola, un evento que os días 12 e 13 de abril reunirá na parroquia de Sedes, no recinto feiral, a unha trintena de postos de venda de produtos e maquinaria agrícola. O Concello organiza un ano máis este evento, con entrada de balde e ao que se poderá acudir os dous días en horario de mañá e tarde, de 11.00 a 14.00 e dende as 16.00 ata as 20.00 horas.
Plantas da horta, árbores froiteiras, especies ornamentais… forman parte dos produtos que se poderán ver e adquirir nesta feira, onde tamén se porán á venda queixos, embutidos, patacas, hortalizas, pan artesán… Así o avanzou a concelleira naronesa, que explicou que se desprazarán ata a zona dúas empresas con diversa maquinaria agrícola, tamén con apartado de venda e exposición.
As nenas e nenos que se acheguen ao recinto feiral terán a oportunidade de participar, de balde, en obradoiros sobre plantación, levando á casa as súas propias plantas. Terán lugar en horario de mañá e tarde, tanto o sábado como o domingo, de 12.00 a 14.00 e dende as 16.30 ata as 18.30.
Música e gastronomía
A Feira multisectorial agrícola contará tamén cun apartado musical e gastronómico, con sesión vermú nas dúas xornadas e unha degustación de produtos da terra o domingo ao mediodía. A maiores, os dous días poderase comer polbo, churrasco e liscos nun posto que se instalará para a ocasión na zona vendendo estes produtos.
«Organizamos a maiores uns sorteos para esta feira, o sábado e o domingo, de produtos dos que están á venda, que poderá levar a xente que realice algunha compra coas rifas que se entregarán dende os diferentes postos”, apuntou Gómez.
A edila naronesa recordou que esta feira “reúne cada ano en Narón a moitas persoas interesadas en produtos agrícolas, aos que convidamos a achegarse tamén a esta edición para ver a gran variedade e cantidade de produtos que traerán os responsables de cada posto».