Vinte produtores fórmanse para poder operar no centro de transformación A Fusquenlla, en San Sadurniño e Moeche

Vinte produtores da comarca fórmase desde o venres nun novo curso para poder operar no centro de transformación agrolimentaria A Fusquenlla. Son oito módulos e 39 horas de teoría (na Casa da Xuventude de San Sadurniño) e práctica (no centro situado no recinto feiral de San Ramón de Moeche). As sesións comezaron cunha introdución á manipulación de alimentos, que abordou a hixiene alimentaria, os controis sanitarios e a normativa sobre trazabilidade e etiquetaxe.

A maior parte do tempo dedicarase á formación práctica, que «lle permitirá ao alumnado concienciarse coa prevención de riscos laborais e familiarizarse co funcionamento de todo o equipamento da Fusquenlla». A maquinaria dispoñible serve para transformar produtos de horta e froita, elaborando conservas, zumes, compotas, marmeladas e deshidratados. O manexo dos aparatos máis avanzados, como cocecremas, tamizadoras ou sistemas de envasado ao baleiro, é un dos puntos básicos do curso, apuntan desde A Fusquenlla. O uso do autoclave, un dos elementos «máis importantes», abordarase nos módulos finais da formación.

O alumnado aprenderá a analizar «os valores de pasteurización e asegurar que as conservas sexan totalmente seguras para o consumo e a comercialización». Na Fusquenlla cooperan os concellos de Cedeira, Cerdido, Moeche, Narón, As Pontes, San Sadurniño e Valdoviño. Conta co apoio da Deputación, que integrou o centro na súa Rede de Espazos Coworking PEL, para apoiar o emprendemento e dinamizar o rural.

---

---

---