A Xunta recollerá propostas para actualizar o Plan Xeral de Normalización da Lingua Galega a través dun formulario na web
GALICIA
Estará dispoñible a partir de mañá no Portal da Lingua
21 jul 2025 . Actualizado a las 18:31 h.A actualización do Plan Xeral de Normalización da Lingua Galega entra na súa segunda fase, na que a Xunta abre o proceso á cidadanía habilitando un formulario web para recoller as achegas de todas aquelas persoas que queiran participar. Segundo anunciou o conselleiro de Cultura, Lingua e Xuventude, José López Campos, estará dispoñible a partir de mañá no Portal da Lingua.
Durante tres meses, calquera persoa poderá enviar, a nivel individual ou colectivo, a súa proposta a través dunha caixa virtual. «Con esta medida, cumprimos coa folla de ruta prevista desde o inicio, cando xa avanzamos a nosa vontade de escoita e clara intención participativa, implicando non só aos grupos políticos, tamén aos axentes sociais e á poboación en xeral», afirmou López Campos, que lembrou que seguen tendo a man tendida para que a as formacións políticas participen neste proceso. «É importante, estannos a pedir que deamos un paso ao fronte, que nos poñamos de acordo», dixo.
Acompañado polo secretario xeral da Lingua, Valentín García, o conselleiro reuniuse esta tarde cos responsables dos once grupos de traballo formados para levar a cabo o proceso de renovación do plan, que lle entregaron ao coordinador da súa actualización, o académico Manuel González, a primeira documentación obtida tras preto de 250 contactos con institucións, asociacións, colectivos e persoas individuais de relevancia nas distintas áreas temáticas nas que se estruturou un proceso iniciado en decembro.
López Campos agradeceu «a dedicación e esforzo dos expertos que conforman cada un dos bloques na recollida e análise das achegas para que o coordinador conte hoxe coas primeiras conclusións», insistindo en que se está a seguir o calendario establecido.
Con esta primeira fase, subliña o conselleiro que conclúe un percorrido iniciado hai un ano, con contactos coas distintas formacións políticas con representación no Parlamento de Galicia e que continuou coas conversas por parte dos membros das comisións coas principais institucións culturais galegas, como a Real Academia Galega da Lingua ou o Consello da Cultura Galega, entre outras, así como con outros entes como a Nova Escola Galega, a Coordinadora de Traballadores de Normalización da Lingua ou as fundacións de Rosalía de Castro, Curros Enríquez e Uxío Novoneyra.