Campos di que a cantidade corresponde en parte aos socios que non pagaron
05 ene 2023 . Actualizado a las 17:30 h.O tesoureiro do Lemos analiza a actual situación económica do club. José Luis Campos recoñece que pode haber un desequilibrio de 10.000 euros, polo que pide aos socios que aínda non pagaron o carné que o fagan. O directivo afirma que están ao día nos pagos —de feito abonou onte a mensualidade de decembro— e agradece o respaldo dos patrocinadores, que aportan o 35% do orzamento.
—Cal é a situación financeira do Lemos?
—Teño que dicir que estamos ao corrente dos pagos. Temos bastante avanzada a recadación da tempada, pero con certo temor. Podería haber algo de desequilibrio económico, que podería ser de 10.000 euros.
—A que correspondería esa cifra?
—Esa cifra correspondería aos 80 socios que aínda non pagaron o seu carné e o descenso na recadación nos partidos. As entradas na Pinguela son menores que a campaña pasada, e o consumo no bar, a merca de entradas e de rifas tamén descendeu. As taquillas baixaron un 20%.
—A que obriga esta situación?
—Isto vai obrigar a poñer tres días do club, o que implicaría que os socios pasasen por taquilla. Eu pido á xente que acude cada domingo ao campo que consuma máis e que merque máis rifas. Espero que nestes trece partidos que xogaremos na casa ata o final de campaña a xente se sensibilice e nos axude un pouco máis.
—Son maiores os gastos desta tempada con respecto aos da pasada?
—Si, si. Fixemos un esforzo grande á hora de confeccionar a plantilla aínda que isto non quede reflectido na clasificación. A plantilla desta tempada é 1.000 euros máis cara que a do ano pasado.
—Tal como asegura vostede, por agora non queda reflectido na competición.
—Houbo cousas que non saíron ben. Josito non cuallou como técnico no Lemos, as fichaxes de Dani Real e de Galass non saíron ben, porque non aportaron nada. E despois está a lesión de Santi Real, un dos futbolistas chamados a marcar as diferenzas. Foron un cúmulo de circunstancias que nos penalizaron bastante.
—Os técnicos din que non hai cartos para reforzar o equipo, é verdade?
—Todo depende do que pase. Non imos deixar descender ao Lemos. Se se produce algunha lesión e hai que ir ao mercado faremos un esforzo, pero se non ocorre nada raro, seguiremos confiando nesta plantilla, que entendemos que é suficiente para conseguir a permanencia na Preferente con solvencia. Non vemos necesidade de fichar agora mesmo, porque xa fixemos un esforzo con Brais Meco e Diego Torres, e agora darémoslle protagonismo á canteira. Acabamos de subir a Álex Sanmartino. Ese é o camiño.
—Influíu na economía o quedar eliminados cedo da Copa?
—O ter pasado da Copa causou o prexuízo económico ao Lemos importante. Ingresamos 800 euros cando pudemos obter 9.000 se tomásemos a Copa en serio, e así xa non habería temor a ese desequilibrio do que falei. Os xogadores do Lemos B déronlle unha lección aos do primeiro equipo chegando a semifinais. Espero que non se repita este ano o do Lemos A.
—Están ledos coas achegas dos patrocinadores?
—Moi ledos, porque salvan a tempada. Achegan o 35% do orzamento do club.
—E coas institucións?
—Tamén, aínda que de cara ao centenario solicitaremos axudas á concellería de Cultura de Monforte, a Deputación e a Xunta.
—Como van os preparativos do centenario?
—A partir do verán daremos a coñecer os actos. Agora estamos co merchandising. Vendemos chaveiros a 5 euros e polos e camisetas a 30. Quero facer fincapé nos patrocinadores do centenario, que son Celega, Instalaciones del Valle, Carpintería Javier, Paradores, Gonzalo Seguros e Alcor. Asinaron co Lemos un contrato por tres tempadas. É unha importante inxección económica.
—Que lle pide aos Reis Magos?
—Pídolle conseguir a permanencia e lograr o equilibrio económico. Con iso xa quedaría moi satisfeito.