Nesta casa de Chantada viviu... o fillo de fidalgos que fundou unha orde baseada na vida contemplativa
CHANTADA
Juan Alfonso Varela de Losada y Samosa naceu no século XVII na parroquia de Brigos
27 oct 2025 . Actualizado a las 13:04 h.No lugar de Brigos de Arriba, a última casa na cima do lugar e a esquerda, está a que foi o fogar e onde naceu no ano 1723 Juan Alfonso Varela de Losada y Samosa. Este relixioso de Chantada foi o fundador da Sagrada Orde de Penitencia de Xesús Nazareno, unha orde católica creada en Salamanca.
Juan Alfonso Varela de Losada y Samosa finou na cidade italiana de Ferrara no ano 1769 e é un frade considerado pola Igrexa Católia como venerable, o que quere dicir, que pode ser beatificado.
A orde que fundou en Salamanca chegou a ter 33 conventos con 255 frades en diferentes países do mundo, pero sobre todo en Italia e no centro de Europa.
Este relixioso do século XVII era de familia fidalga e cursou os seus primeiros estudos en Monforte. Posteriormente alistouse no exército, pero acabaría desertando. A pesar diso, en 1747 entrou ao servizo de Luís de Borbón, fillo de Felipe V, e ese paso cambiou a súa vida.
No 1750 viaxou a Salamanca como penitente e alí entrou en contaco coa monxa clarisa Rosa del Castillo, que o animou a fundar unha nova orde relixiosa. A Sagrada Orde de Penitencia de Xesús Nazareno baseaba a súa regra na vida contemplativa e á vez activa.