A ruta de Uxío Novonyera preséntase en cinco apartados diferentes, que corresponden respectivamente a espazos literarios, espazos biográficos, bosques, castros e ruínas romanas, así como a lagoa de Lucenza e o castelo de Carbedo.
Na ruta figuran ademais as localidades de Parada, Moreda, Mercurín, Vilar, Ferrería Nova, Céramo, Romeor, Seoane, Folgoso, Meiraos, Santa Eufemia, Teixeira, Piñeira, Lousada e Pacios; os montes Pía Paxaro, Formigueiros, Cido, Fedo e Taro Branco; as igrexas e capelas de Esperante, San Román e San Roque; as minas romanas da Toca e Romeor e diversas paraxes naturais como a Campa de Lucenza, Val das Mouras e a Devesa da Rogueira.
O itinerario só é accesible a través de Internet, na páxina Culturagalega.org, e pode imprimirse en papel, descargarse en sistemas GPS ou adaptarse ao programa Google Earth.
No mesmo portal xa se editaron previamente outras rutas dedicadas a Rosalía de Castro, Manuel Curros Enríquez e Eduardo Pondal. Manuel Gago, director deste portal, sinala que a iniciativa pretende utilizar as modernas ferramentas tecnolóxicas para superar as limitacións dos itinerarios culturais tradicionais baseados na edición de folletos e na colocación de letreiros.