Aprobadas axudas para as igrexas de Lagostelle, en Guitiriz, e San Pedro de Alcántara, en Mondoñedo
LUGO
No apartado de axudas excepcionais, onte foron aprobadas catro. Así, o organismo provincial subvenciona con 27.379 euros a colocación de vidreiras na igrexa guitiricense de San Xoán de Lagostelle; con 24.000 a celebración da terceira edición da feira Equigal; con 85.628 a reposición da liña de media tensión e do transformador que dá asistencia ao campo de Rozas; e con 185.000 euros a transformación da igrexa de San Pedro de Alcántara, en Mondoñedo, nun centro sociocultural.
En relación con este último proxecto, o responsable da Área de Cultura da Deputación, Antonio Veiga, subliñou que se vai crear «un espazo de exposición para aproveitamento cultural, educativo e turístico, no que se difundirán as figuras artísticas máis importantes da historia de Mondoñedo: Leiras Pulpeiro, Noriega Varela, Pascual Veiga, Cunqueiro ou o mestre Pacheco e os demais mestres de capela».
Recentemente foron inauguradas as obras de acondicionamento do contorno desta igrexa, realizadas coa achega do Ministerio de Vivenda. Agora, o que fará a Deputación será dotar de contidos a capela a partir do patrimonio literario e cultural de Mondoñedo. O futuro centro contará con diferentes espazos para exposición de fondos, recepción de visitantes e realización de actividades divulgativas. Deste xeito, ademais de dispoñer dunha oferta expositiva e cultural de carácter permanente, o novo centro erixirase como foco xerador de iniciativas en beneficio do desenvolvemento e a dinamización cultural, social e económica de Mondoñedo.
Antonio Veiga lembrou que a igrexa mindoniense de San Pedro de Alcántara, que está desamortizada e é de propiedade municipal, xa tivo historicamente unha vinculación co uso cultural do seu espazo, especialmente no ámbito musical, e aparece incluso citada en varios escritos históricos como «teatro da Alcántara», polo que reconvertela para uso sociocultural confírmase como «unha iniciativa moi positiva».