A área de Cultura do Concello rehabilita a homenaxe realizada pola institución no marco do Día das Letras Galegas
16 may 2020 . Actualizado a las 11:51 h.A área de Cultura, Turismo e Promoción da Lingua restaurou nos últimos días as citas literarias situadas na praza Maior e na rúa Bispo Aguirre. Segundo declarou a concelleira de Cultura, Maite Ferreiro, «trátase dunha intervención iniciada coa restauración das estatuas dos distintos escritores e escritoras». Deste xeito, sinalou Ferreiro, rehabilítase «a homenaxe que o Concello de Lugo realizou a estes persoeiros tan importantes da nosa cultura, no marco dunha data tan destacable como o Día das Letras Galegas».
A edil de Cultura subliñou que estes «elementos ornamentais de contido cultural e identitario forman parte da imaxe da cidade por estar situadas na zona máis concorrida e visitada de Lugo». Engadiu que se trata dunha «intervención de mínimo custo para o concello, que mellora considerablemente a estética da zona máis céntrica da cidade e que pon en valor ás persoas que representan a nosa cultura e á nosa identidade como pobo».
As nove placas colocadas sobre sete soportes de granito están situadas na praza Maior e na rúa Bispo Aguirre están adicadas a: Manuel María, Afonso Daniel Rodríguez Castelao, Rosalía de Castro, Ramón María de Valle-Inclán, Eduardo Pondal, Ramón Otero Pedrayo, Uxio Novoneyra, Álvaro Cunqueiro e Manuel Curros Enriquez.