A Rede Museística Provincia presenta unha mostra coa vestimenta das mulleres que retratou Walter Ebeling
17 mar 2025 . Actualizado a las 05:00 h.A Rede Museística Provincial inaugurou hai máis dunha semana en San Paio de Narla a mostra «Soterradas: vidas e historias. As mulleres: Walter Ebeling», que recrea algunhas das fotografías realizadas polo lingüista alemán durante as súas viaxes pola provincia de Lugo entre 1928 e 1933.
Do amplo arquivo do investigador, a mostra céntrase na reconstrución de escenas protagonizadas por mulleres, poñendo en relevo o seu traballo no campo e nas tarefas domésticas.
A recreación presta especial atención á vestimenta, empregando prendas orixinais de distintos puntos da xeografía lucense recollidas ou recreadas pola asociación Sete Espadelas, que reflicten a evolución da vestimenta tradicional coa incorporación dos primeiros tecidos industriais ou as diferenzas no vestir segundo as clases sociais.
Con esta mostra, a Rede Museística Provincial de Lugo quere visibilizar e contar a nosa historia poñendo o foco nas vidas das mulleres.
A mostra complétase con intervencións tanto no Museo Provincial de Lugo como no Pazo de Tor, en Monforte, que tamén contan con escenas recreadas con vestimenta tradicional. Poderanse ver as diferentes coleccións ata o 30 de maio.