«É unha festa que representa o mellor que somos e está a ser un éxito», dixo a líder do BNG
10 oct 2025 . Actualizado a las 14:51 h.A portavoz nacional do BNG, Ana Pontón, visitou este venres o San Froilán de Lugo, poñendo as festas patronais de Lugo «como símbolo dunha cidade acolledora, que aposta pola defensa da nosa cultura e da nosa identidade».
Na súa visita a Lugo, acompañada do tenente de Alcalde, Rubén Arroxo, e do vicepresidente da Deputación, Efrén Castro, entre outros cargos do BNG, aproveitou tamén para destacar o traballo político que está a facer a súa formación no Concello:«Levamos tempo axudando á transformación de Lugo, sendo un motor que aposta por crear espazos urbanos de calidade, por defender a nosa cultura, por avanzar tamén da modernización dos nosos espazos», afirmou.
Subliñou que o BNG está demostrando que esta cidade «ten un proxecto de futuro que mellora a vida das persoas” e que aposta por “confiar no que somos como galegos e galegas».
«É para min un gustazo poder estar un ano máis no San Froilán, unha festa que non veño só como portavoz nacional do BNG, senón que é unha festa de referencia para min. Todos os anos era un punto obrigado na miña vida familiar visitar o San Froilán, comer o polbo e poder gozar das atraccións», declarou a líder nacionalista logo de percorrer o centro da cidade e ir ao feiral, onde acudiu ás casetas do polbo. «O San Froilán é unha festa que representa o mellor que somos e que ademais está a ser un éxito para a cidade», concluíu.