A vicepresidenta da Deputación, Maite Ferreiro, e a xerente da Rede Museística Provincial, Encarna Lago, presentaron no Museo Fortaleza San Paio de Narla en Friol os programas de actividades escolares dos museos integrados na rede para o curso 2019-2020. Os departamentos de didáctica dos catro museos -Museo Provincial de Lugo, Museo Fortaleza San Paio de Narla, Museo Provincial do Mar e Pazo de Tor - poñen a disposición dos centros escolares unha programación novidosa que emprega o patrimonio para traballar os 17 obxectivos de desenvolvemento sustentable definidos pola ONU en 2015. Lago destacou que «os museos de Lugo serán os primeiros do Estado en que se traballe nos 17 obxectivos de desenvolvemento sustentable que marca a Axenda 2030 e que son de obrigado cumprimento para as institucións culturais». Lago enfatizou o simbolismo de presentar unha programación pioneira en San Paio de Narla, «museo no que se empezou a traballar no ámbito da didáctica, desenvolvendo actividades que supuxeron un amplo recoñecemento, mesmo internacional, para a rede museísta provincial». «Con esta programación queremos volver a xenerar unha revolución educativa», concluíu.
Maite Ferreiro, subliñou a importancia de «transladar aos nenos e nenas o valor do que temos, darlles a posibilidade de coñecelo para que logo o valoren, o coiden e o queiran. Desde as institucións temos a obriga de traballar para que estes proxectos
saian adiante e de coidar espazos coma este».