Haberá música e homenaxes a Manuel María e Saleta Goy
05 jul 2023 . Actualizado a las 05:00 h.Sábado 8 • Desde as 11.15 horas • Outeiro de Rei •
Outeiro de Rei acollerá o Convivio da Cultura Galega este sábado. O encontro anual do asociacionismo cultural de base chega este ano á décima edición, con máis de 25 entidades que participarán na xuntanza organizada pola Casa-Museo Manuel María e a Federación Galiza Cultura, co apoio da área de Vicepresidencia da Deputación.
As directivas das asociacións que integran a Federación Galiza Cultura reuniranse pola mañá para facer balance das súas actividades, compartir reflexións, establecer sinerxias e artellar a súa actuación en común.
Ademais, a música tradicional é unha das grandes protagonistas do convivio. A carballeira de Santa Isabel, un espazo natural situado á beira do río Miño, acollerá, por décimo ano consecutivo, a actuación da Banda de Música Sons e Soños. Integrada por músicos de Rábade, Begonte, Outeiro e Friol, a banda foi a encargada de amenizar a xuntanza desde a primeira edición. Nesta ocasión estará acompañada pola fadista galega Iria Estévez o guitarrista portugués Artur Caldeira.
A festa continuará pola tarde cunha foliada conducida por Xurxo Souto. O músico, xornalista e escritor coruñés, ideólogo do rock bravú e cantante dos Diplomáticos de Monte Alto, é unha figura de referencia na historia do convivio e será, unha edición máis, o mestre de cerimonias da celebración.
As referencias ao recordado escritor chairego serán constantes ao longo da xornada: nas actuacións musicais interprétanse pezas sobre os seus textos, e el e a súa dona Saleta Goy serán obxecto dunha ofrenda no cemiterio. A Casa-Museo é o punto de encontro no que dará comezo a celebración, ademais de albergar o encontro das asociacións que integran a Federación Galiza Cultura.
A programación é a seguinte:
· 11.15h. Acollida na horta da Casa-Museo Manuel María coa coral Solfa
· 11.45h. Saída a pé para a carballeira de Santa Isabel con parada no cemiterio de Outeiro para a ofrenda a Manuel María e Saleta Goy
· 12.30h. Actuación na carballeira da Banda de Música Sons e Soños, dirixida por Armando Morales, acompañada pola fadista galega Iria Estévez e o guitarrista portugués Artur Caldeira
· 13.45h. Xantar
· 16.30h. Foliada que conducirá Xurxo Souto na carballeira coas actuacións de Birloque Gaiteiros, Vento Mareiro, Zurrumalla, Xurxo Souto & Richi Casás, Os Parabéns, Balura, Tribo, e Tradivivas Agra.