Chévere prepara unha obra documental sobre a chegada de «O derradeira leición do mestre» a Galicia
OURENSE
A compañía de teatro invita ós cidadáns a participar no proceso creativo
21 jul 2025 . Actualizado a las 20:43 h.A compañía Chévere chegou este luns a Ribadavia cunha reprodución do cadro de Castelao A derradeira leición do mestre, dentro dun proxecto que combina teatro documental, investigación e participación cidadá.
A iniciativa, da programación da Mostra Internacional de Teatro de Ribadavia (MIT), forma parte dun proceso creativo que culminará nunha obra teatral que se estreará no 2026, coproducida polo Centro Dramático Nacional, que se representará en Galicia e en Madrid. O proxecto consiste en expor a reprodución do cadro en diferentes espazos e recoller impresións do público a través dun formulario con preguntas, co obxectivo de xerar documentación contemporánea sobre a percepción desta obra. O director e actor de Chévere, Xesús Ron, achegouse ata a vila ourensá para explicar ás persoas que quixeron participar neste proceso que a intención non é usurpar a realidade do cadro orixinal, senón recrear de maneira o máis fiel posible a experiencia de contemplalo, para provocar unha reacción próxima á que se tería fronte á peza auténtica.
O director destaca que a elección desta obra responde ó interese pola narrativa institucional arredor da súa chegada a Galicia. Lembran que o cadro foi trasladado por primeira vez á comunidade por iniciativa do Goberno galego, que organizou unha recepción oficial antes da súa exposición pública. Foi en outubro do 2018. Para Chévere, isto amosa unha clara intención de construír un relato e, a través do teatro, queren ampliar esa conversa social, incorporando outras voces e interpretacións.
A reprodución de Chévere xa percorreu diversos lugares como Culturgal, a Sala Capitol de Santiago durante un espectáculo de Chévere, Ames, Milladoiro, a Facultade de Historia e a Biblioteca Central da Universidade de Santiago, entre outros. A súa presenza en Ribadavia coincide coa mostra de teatro da localidade, un espazo que, segundo Xesús Ron, permite achegarse a públicos diferentes dos habituais en Santiago e na área atlántica.
«O cadro vai asociado a un formulario, en formato QR, que para nos é moi relevante, xa que é parte do proceso de documentación e investigación previo a facer a obra. Xeramos unha documentación contemporánea sobre o cadro e permítenos saber que lectura fai a xente de hoxe sobre el» relata.
Xesús Ron destaca que cada vez resulta máis complicado escoller ideas para as obras, tras preto de 40 anos de historia da compañía. «Estamos nun permanente estado de escoita do que pasa ó noso redor para poder atopar ideas que nos removan un pouco. Pero o noso propósito tamén é traballar sobre temas que responden a unha conversa social maior. E sempre aparecen uns detonantes que nos conectan directamente con algo. Neste caso foi que hai pouco que se trouxo esta obra. Preguntámonos, por que a maior autoridade deste país decide traer agora esta cadro. Pareceunos curioso que o Goberno de Galicia fixera unha recepción oficial do obxecto, antes de inaugurar a exposición. Vimos unha intención narrativa, quérennos contar unha historia. Encántanos e invitamos ó resto da sociedade a que participe nesa narrativa, xa que o teatro é un gran amplificador de conversas».
Con 38 anos de traxectoria, Chévere continúa en xira coa obra Helen Keller, a muller marabilla?, sobre a vida dunha figura histórica norteamericana xordocega e militante socialista. A montaxe, bilingüe en lingua oral e de signos, supuxo para a compañía unha aproximación ó mundo da accesibilidade e á cultura xorda, reivindicando que as producións culturais sexan accesibles para todas as persoas.