O Festival RiR de Allariz inagurarase con «A lingua das bolboretas», no 25 aniversario da película rodada na vila
ALLARIZ
O cartel da cita foi deseñado pola ourensá Soraya Picouto
25 jul 2025 . Actualizado a las 05:00 h.O Festival RiR inaugurará a súa oitava edición o 30 de agosto cunha xornada dedicada ao 25 aniversario do filme A lingua das bolboretas, do director José Luis Cuerda, obra moi vinculada a Allariz polo recordo que deixou a súa rodaxe entre os veciños da vila. O festival concederalle este ano o seu premio honorífico «Rir Contigo» a Xosé Lois González pola súa traxectoria como viñetista. A directiva do festival decidiu por unanimidade outorgarlle este recoñecemento. O galardón entregarase o sábado 6 de setembro ás 20.30 horas durante a gala de premios, que será retransmitida por streaming na canle oficial do festival.
Nesta edición, o cartel oficial foi deseñado pola ourensá Soraya Picouto. «No deseño deste cartel quixen representar o que a cultura —e en especial o humor— pode facer por nós: devolvernos a cor cando todo semella gris. Regar con risas e emocións é un acto revolucionario. Como deseñadora é un privilexio poñer a miña creatividade ao servizo dun festival que aposta pola cultura con sentido», explicou.