Sobrado do Bispo convértese en epicentro cultural coa segunda edición do festival Emulart
BARBADÁS
O evento, impulsado pola veciñanza e co apoio do Concello de Barbadás, ofrecerá 15 actividades culturais do 12 ao 20 de xullo
07 jul 2025 . Actualizado a las 05:00 h.A parroquia de Sobrado do Bispo acollerá do 12 ao 20 de xullo a segunda edición de Emulart, un festival cultural que nace da iniciativa veciñal e que conta coa colaboración do Concello de Barbadás a través da concellería de Cultura. Durante sete días, o evento ofrecerá un total de 15 actividades artísticas que se desenvolverán en múltiples escenarios da vila, como prazas, o convento, o bar ou mesmo a igrexa parroquial.
O alcalde de Barbadás, Xosé Carlos Valcárcel, destacou a importancia deste tipo de propostas culturais no ámbito rural: «Sobrado sempre foi faro de cultura e referente en todo o concello». Valcárcel subliñou tamén a diversidade artística do festival, que incluirá música clásica, contemporánea e tradicional, así como exposicións e proxeccións audiovisuais. «Queremos que Sobrado sexa un referente para outras parroquias», engadiu.
O festival abrirase o día 12 cun concerto de Rafael Yebra e Oswaldo Oro na igrexa da localidade, marcando o inicio dunha semana de intensa actividade cultural e convivencia. O director artístico do festival, Rafael Yebra, puxo en valor a transformación do concepto tradicional de cultura: «Se antes pensabamos na cultura nun auditorio, agora podémola atopar en calquera espazo». Para Yebra, o obxectivo de Emulart é crear un lugar de encontro e desenvolvemento artístico, convertendo a Sobrado e Barbadás «no epicentro da cultura nestas datas». Ademais da programación do festival, o alcalde anunciou a finalización da rehabilitación da antiga escola de Sobrado, que pasará a ser un espazo de usos múltiples e de ensaio para a coral Voces e Cordas.