O multiinstrumentista compuxo e executou a banda de apertura dos Xogos Olímpicos de Sídney
28 jul 2025 . Actualizado a las 05:00 h.O claustro do Mosteiro de San Salvador de Celanova volverá encherse de música, historia e emoción coa chegada da undécima edición do Festival Hércules Brass, que do 28 de xullo ao 1 de agosto transformará a vila no epicentro internacional dos instrumentos de vento-metal. Este ano o festival bate o seu propio récord con máis dun cento de alumnos inscritos, unha cifra que confirma o éxito dunha cita que naceu como un pequeno soño e que se converteu nun referente para estudantes e amantes da música de toda Galicia, Portugal e outras comunidades próximas. A demanda foi tan grande que algunhas especialidades, como trompeta, esgotaron prazas en menos dunha hora, o que obrigou á organización a reforzar o equipo docente pero sen ampliar o número de participantes para manter a esencia dun ensino próximo e personalizado.
A orixe deste festival remóntase á inquedanza dos integrantes do quinteto Hércules Brass, que hai máis dunha década decidiron traer a Galicia algo semellante ós encontros europeos nos que participaran como estudantes. Foi entón cando pensaron en Celanova, e non foi unha elección casual. O claustro do Mosteiro de San Salvador, coa súa acústica extraordinaria e a súa capacidade para acoller grandes formacións, ofrecía o escenario perfecto. A isto engadíronse os apoios institucionais, co Concello de Celanova, a Xunta e a Deputación respaldando un proxecto que une música, formación e patrimonio histórico.
Este ano a programación ten un sabor especial. O festival recibe a artistas de talla mundial, con nomes como o multiinstrumentista australiano James Morrison, unha auténtica lenda do jazz e do swing; o quinteto estadounidense Boston Brass, considerado unha das formacións de metais máis dinámicas do mundo; e o trompetista e multiinstrumentista galego Abraham Cupeiro, que actuará acompañado pola Orquestra Gaos.
Para os organizadores, esta edición supón un paso máis na evolución do festival cara a repertorios máis abertos e comerciais, con tintes de swing e estilos próximos ó gran público, sen abandonar a súa vocación formativa nin o seu compromiso coa calidade artística.
O programa de concertos está deseñado para atraer tanto a melómanos como a quen se achegue por primeira vez á música de metais. A apertura, o 28 de xullo, contará con James Morrison acompañado pola Banda de Música de Celanova, nunha noite que promete ser inesquecible. O multiinstrumentista compuxo e executou a banda de apertura dos Xogos Olímpicos de Sídney, entre outros concertos únicos. Os días 29 repite co seu cuarteto. O 30 será a quenda de Boston Brass, cuxos concertos se caracterizan pola súa enerxía e a súa proximidade co público. O 31 de xullo Abraham Cupeiro presentará un percorrido por sonoridades antigas e contemporáneas xunto á Orquestra Gaos, unindo tradición e innovación nun concerto moi agardado. A clausura, o 1 de agosto, reunirá sobre o escenario a Boston Brass, Adam Rapa, Isabel Rubio, e o Hércules Brass Ensemble, nun final que aspira a ser unha homenaxe á música de metais en todo o seu esplendor.
Pero o Festival Hércules Brass non se reduce ós seus concertos. A formación segue a ser a súa gran sinal de identidade. Cada día os máis de cen estudantes participarán en clases maxistrais e ensaios de música de cámara con algúns dos mellores profesores do mundo, ademais de obradoiros de alto rendemento e intelixencia emocional impartidos por Elena Muerza, unha novidade desta edición que busca potenciar non só a técnica senón tamén a xestión mental e emocional dos músicos. O alumnado, procedente na súa maioría das catro provincias galegas e do norte de Portugal, aloxarase no albergue municipal posto a disposición polo Concello, con opción de media ou pensión completa, un xesto que reforza o vínculo entre a vila e o festival.
A filosofía do encontro segue fiel á súa esencia. Non se trata dun festival para virtuosos de elite, senón dunha experiencia pensada para quen quere aprender dos mellores sen necesidade de pasar por procesos de selección. «Non queremos facer un festival no que veñan os mellores alumnos europeos, a idea é traer o mellor profesorado para todos» di Alejandro Vázquez, membro da organización. Este enfoque, xunto ao trato humano e próximo, converteu Celanova nun lugar de peregrinación anual para mozos músicos que atopan aquí un espazo onde medrar e compartir a súa paixón.
O festival tamén conseguiu proxectar a imaxe de Celanova ao mundo grazas ao seu canal de YouTube, que supera os dez mil subscritores e acumula máis de dous millóns e medio de reproducións en oitenta e sete países. Moitos dos vídeos gravados en edicións anteriores amosan a espectacularidade do claustro como escenario e a calidade dos artistas invitados, o que contribuíu a dar a coñecer a riqueza patrimonial da vila ourensá.