![](https://img.lavdg.com/sc/ivZ7kJE9vzxSZnUjfAUrWu1PDMw=/480x/2023/03/18/00121679155622025117620/Foto/PM19C10F3_17622.jpg)
Antela Editora anunciou a publicación das bandas deseñadas de Eli García e María Brenn
19 mar 2023 . Actualizado a las 05:00 h.Coincidindo coa inauguración da primeira edición de BDra Gráfica de Pontevedra, Ana Miralles (Madrid, 1959) recibiu no Teatro Principal o Premio a Toda unha Carreira de mans da concelleira de Cultura, Carme Fouces, e do coordinador do festival e director de O Garaxe Hermético, Kiko da Silva.
De feito, este último destacou que se trata dunha «das autoras españolas de banda deseñada de maior proxección internacional, que se iniciou no cómic underground e prosperou no erotismo, consagrándose definitivamente no mercado francés con obras de corte fantástico como Eva Medusa e especialmente coa serie Djinn». Tras destacar que xunto a Emilio Ruíz publica en Astiberri o libro infantil Wáluk, unha fábula ecoloxista e Muraqqa, precisou que, «na actualidade preparan unha banda deseñada titulada Ava, un relato das 48 horas que pasou a estrela de cine en Río de Xaneiro, en 1954».
Ademais, BDra Gráfica adícalle no Museo de Pontevedra unha exposición a autora. Ana Miralles, a sedución do grafito, supón «un percorrido pola súa traxectoria e unha mostra do seu peculiar e artesanal proceso creativo. Nela podemos ver os primeiros bosquexos, as composicións de páxina, os debuxos preliminares e estudos de vestiario e attrezzo, así coma as tintas e artes finais coloreadas dun xeito moi coidadoso con acuarelas. Unha ocasión única de ver en directo a unha autora de BD que pulveriza récords coa venda de orixinais nas poxas de Christie’s París (en colaboración coa galería Daniel Maghen)».
Por outra banda, unha das sorpresas do festival produciuse onte coa revelación de dúas exclusivas editoriais. Así, Antela Editora sacará en galego o vindeiro mes de abril as obras O grande aviario, da pontevedresa formada nas aulas de O Garaxe Hermético Eli García, na que é «a súa primeira obra longa como autora completa».
![](https://img.lavdg.com/sc/NS3Pu59yFYZ9IG95HWKguz4e2PY=/480x/2023/03/18/00121679169781122563926/Foto/PM19C10F1_21215.jpg)
De igual xeito, a mesma editorial ten previsto anunciar a primeira banda deseñada «doutra autora galega nova, María Brenn, coñecida ilustradora de libros infantís, que se estrea na novena arte cun cómic para cativos titulado Ula e Vinca. No 2017 recibiu o décimo cuarto Premio Pura e Doura Vázquez de Ilustración pola obra realizada a partir do texto Do meu nome e outras trapalladas de Antonio Yáñez Casal».
Programa do domingo
En canto á programación deste domingo, ás 11 horas, Anémona de Río, Miguel Rojo, Pablo Prado, Fon e Ánxel Carramal, acompañados por Kiko da Silva, falarán dos Premios O Garaxe Hermético de banda deseñada en colaboración coa editorial Xerais. Ao seu termino, e tamén no Teatro Principal, os asistentes a BDra Gráfica poderán gozar cunha conferencia a cargo de Miguelanxo Prado (12.15 horas). Tamén estará acompaño por Kiko Da Silva no seu rol de editor en galego da obra do máis internacional dos autores galegos.