É unha das actividades previas ao día grande do Samaín, o 31 de outubro
29 oct 2024 . Actualizado a las 16:14 h.Dende este mércores, e co trasfondo da festividade do Samaín, distintas panaderías pontevedresas recuperan a tradición do Pan de Ánimas. Dende o Concello destacaron que «antigamente en Galicia, na noite de Defuntos existía o costume de deixar anacos de pan na mesa para que comesen as ánimas», de tal xeito que se considera que esta tradición «vén da crenza ancestral de que os defuntos levan consigo pan para axudarlles na viaxe ao alén».
«Sexa para axudar as ánimas ou para deleitar os vivos, queremos recuperar esta tradición senlleira da nosa cultura que está a piques de desaparecer», engadiron destacando que, logo do éxito das actividades previas á Noite dos Calacús, celebradas a pasada fin de semana, o día grande do Samaín será este xoves . Deste xeito, desenvolveuse unha programación especial no Mercado de Abastos e a posterior Procesión das Ánimas.
Asimesmo, entre o venres 1 e o domingo 3 terá lugar o Mercado de Samaín con artesanía, alimentación, xogos, contacontos...
Neste sentido, precisaron que, aínda que as actividades con inscrición previa que terán lugar na tarde do xoves 31 no Mercado teñen xa as prazas cubertas, a organización convida a participar nas numerosas alternativas que non precisan de inscrición. É o caso dos postos de maquillaxe para a posterior Procesión de Ánimas, tallado de calacús, contacontos... E, como non, tamén gozar da música ambiente, do concerto da Banda de Música de Pontevedra e coa sesión de Señora DJ.
Dende o Concello de Pontevedra, ademais, fíxose tamén un chamado á cidadanía á participación na Procesión das Ánimas, caracterizada, con sabas brancas e portando candeas, con maquillaxe branca... como o farán os membros da Aula Municipal de Teatro. Sairán do Mercado ás 21 horas e, tras un percorrido polo Centro Histórico amenizado por música de Adarve, finalizará cara as 21.30 horas novamente no Mercado.