Mabel Fraga compaxina o seu traballo como docente e investigadora na USC coa montaxe da exposición da nova sede do museo Luis Iglesias.
-¿O museo de historia natural é o gran descoñecido para os composteláns?
-Cando estaba na Facultade de Química tiñamos visitas de colexios, asociacións e mesmo do centro psiquiátrico de Conxo, pero menos a título individual. Á xente custáballe entender que houbese un museo dentro dunha facultade. Agora é distinto, porque o edificio ten unha actividade única como museo e o formato e a exposición son totalmente distintas, todo máis aberto e cun discurso baseado na xeo e na biodiversidade.
-¿Cambiará agora o perfil do visitante?
-Si, vai cambiar, O horario vai ser distinto, de museo, porque antes a facultade pechaba as fins de semana. Turistas só chegaban algúns porque non estaba dentro da rede de museos. Agora chegará xente, ademais de por interese na historia natural, por interese cultural.
-E este é un proxecto que xa leva anos conformándose, ¿non?
-Esta é a única universidade galega que ten un museo de historia natural. É un luxo que estaba pouco aproveitado e tiña pouca visibilidade. Darío Villanueva, cando era reitor, xa buscara algunha forma de poñelo en valor. Nun momento no que as condicións económicas foron favorables, a Xunta, a USC e o Consorcio foron quen de conseguir orzamento para construir este museo.
-¿Crearán unha nova páxina web?
-Si, a idea é facer un museo virtual bastante completo.