Os Xenerais da Ulla terán en Lucí e Rarís os primeiros altos na próxima fin de semana

O Entroido dos Xenerais da Ulla, Festa de Interese Turístico Galego desde 2013, presentouse onte na parroquia estradense de Couso nun acto coa colaboración dos oito concellos que integran a asociación para a súa promoción conxunta: A Estrada, Santiago, Boqueixón, Vedra, Teo, Touro, Silleda e Vila de Cruces. Un acto no que se puxo en valor o traballo no rural e unha tradición que medra cada año en participantes e visitantes. Rosa Iglesias, como representante dos Xenerais dos oito concellos explicou que «non son máis que a voz de todos eses colectivos que ano tras ano loitades e loitamos por manter viva esta tradición, unha tradición que se mantén ao longo dos anos, que nos foron transmitindo os nosos devanceiros e que a nosa misión non é outra que transmitírllelo aos nosos herdeiros». Manuel Brey, de Couso, destacou a figura dos correos, dos abandeirados e tamén «dunha parte importante desa mascarada que se fai no Ulla grazas aos directores, o coro de bonitos», neste caso integrado por xente nova da parroquia estradense. Brey animou a todo o mundo a disfrutar do Entroido.

O director da Axencia de Turismo de Galicia, Xosé Merelles, subliñou «ese arrecendo que hai xa de Entroido, un Entroido que demostra que non hai fronteiras. Son dúas provincias, oito concellos que traballan para que esta manifestación cultural e popular sexa cada vez máis valorada por todos, polos veciños dos oitos concellos, dos habitantes da contorna e por todos os que nos visitan». Os altos dos Xenerais de Lucí e Rarís, en Teo, abrirán a próxima fin de semana as actividades, que terán o seu último acto o 15 de marzo en Conxo.

---

---

---