Medio Rural xa contabilizou 21.700 demandas, dentro dun volume anual de máis de 24.000
17 may 2025 . Actualizado a las 11:41 h.A tramitación da solicitude única da PAC en Galicia rexistrou este ano un ritmo superior ao dos exercicios anteriores, superando xa en máis de 800 as solicitudes presentadas na mesma data da campaña pasada. Actualmente, xa se contabilizan arredor de 21.700 solicitudes gravadas, dentro dun volume anual que supera as 24.000. Estes datos foron presentados polo director xeral da PAC e do Control da Cadea Alimentaria, Juan José Cerviño, na Comisión séptima do Parlamento, onde tamén informou do estado dos pagos das campañas 2023 e 2024.
En canto á campaña 2025, Cerviño destacou a decisión de Galicia de ampliar o prazo de solicitude ata o 15 de maio, e a súa presión para que o Fondo Español de Garantía Agraria (FEGA) eliminase a penalización por presentación tardía ata o 31 de maio, medida finalmente adoptada o pasado 5 de maio.
Avances na campaña 2024 e impacto económico
Respecto á campaña 2024, Cerviño sinalou que Galicia acadou a finais do 2023 un 83% de execución dos pagos de axudas directas, superando amplamente o ritmo doutras comunidades. Posteriormente, realizouse un pago intermedio de 3,5 millóns de euros e xa se iniciou o pago final, previsto antes do 30 de xuño, cun importe estimado de entre 55 e 60 millóns de euros.
No balance da campaña 2023, Galicia saíu beneficiada co novo Plan Estratéxico da PAC (Pepac), cun incremento do 5% nas achegas do FEGA en axudas directas e dun 37% nas primas ao vacún de leite. Sumando os dous piares da PAC, a comunidade recibiu arredor de 360 millóns de euros, destinados a reforzar a sustentabilidade do rural galego.
Cerviño aproveitou para agradecer o traballo do persoal do Fondo Galego de Garantía Agraria (Fogga) e das entidades colaboradoras na xestión destes fondos.
Mellora de infraestruturas rurais e apoio aos produtores locais
A directora xeral da Axencia Galega de Desenvolvemento Rural, Paz Rodríguez, fixo balance dos investimentos en mellora de camiños municipais, destacando que dende 2016 se actuou sobre 6.042 camiños, mellorando 4.744 km de vías rurais, cun investimento de máis de 137 millóns de euros, o 93% dos fondos dispoñibles.
Ademais, o director da Axencia Galega da Calidade Alimentaria, Martín Alemparte, informou das medidas de apoio aos produtores de Faba de Lourenzá, como a liña de axudas directas de 2.000 euros por hectárea para inscritos na Indicación Xeográfica Protexida, e outras iniciativas de financiamento, formación, asesoramento e promoción do produto.