O Grove celebra o mes da lectura, cunha intensa programación arredor dos libros, os contos e o teatro
O GROVE
As propostas comezan o venres, 4 de abril, cun espectáculo de narración e monicreques na bilbioteca
29 mar 2025 . Actualizado a las 05:00 h.O Concello do Grove lanza unha completa e intensa programación cultural para conmemorar abril, mes do libro e da lectura, que dará comezo na biblioteca municipal o vindeiro día 4, ás cinco e media da tarde, co espectáculo de narración e monicreques Os descontacontos, a cargo da compañía Galitoon, unha obra dirixida á rapazada a partir de tres anos, pensada para homenaxear aos avós e avoas que lían contos.
Ese mesmo venres, pero ás oito da tarde, a biblioteca tamén acollerá a presentación do libro Entre o mar e a terra. Unha historia das xentes do Grove, do grovense Bruno Padín, doutor en Historia pola Universidade de Santiago de Compostela e autor tamén de La traición en la Historia de España. O libro está editado polo Concello do Grove co patrocinio do Plan Máis Provincia da Deputación de Pontevedra.
Tan só un día despois, o 5 de abril, ás sete da tarde, chegará ao auditorio municipal a obra teatral Iribarne, que percorre máis de seis décadas da historia política e explora a figura de Manuel Fraga. O 11 de abril, o programa de mobilidade do Centro Dramático Galego ofrecerá aos veciños a posibilidade de ver en Santiago de Compostela a obra do CDG A burra, a mesa e o pan, dirixida por Lorena Conde, subíndose ao autobús do teatro.
O día do libro, o 23 de abril, será a quenda dos escolares, que poderán gozar no auditorio da obra Moby Dick ás onde e media da mañá, da man de Pedras de Cartón. A función está dirixida ao alumnado de Primaria dos centros educativos da localidade.
Para rematar o mes, o 25 de abril, a biblioteca acollerá novamente dobre sesión: ás cinco e media da tarde os cativos a partir de catro anos terán a oportunidade de descubrir o espectáculo Cabicivai, a cargo de Pablísimo, unha proposta sobre rodas que conta coa colaboración do programa Ler conta moito, da Xunta de Galicia. E xa pola tarde, ás sete e media, a actriz meca Atenea García achegará ao público adulto Vicio houbo sempre, unha divertida montaxe que achega a testemuña de mulleres maiores de oitenta anos sobre o desexo, o pracer e a sexualidade.