O recoñecemento feito público a semana pasada pola guía Repsol outorgando a súa distinción de soles e soletes a establecementos representativos das comarcas de Barbanza, Muros-Noia supón, entre outros feitos, un avance substancial da maneira de realizar unha oferta culinaria cunha identidade propia que debería de estar, a estas alturas do século, en mellor lugar do que se encontra nas dúas comarcas, avanzando moito neste derradeiro quinquenio.
A gastronomía pode xogar, e xoga, un papel estratéxico para reverter o modelo turístico actual por outro onde se quebre a desestacionalización, permitindo manter unha oferta baseada no consumo da elaboración de produtos, tanto do mar como da terra, removendo a economía circular de dúas comarcas dotadas para deseñar e producir un modelo turístico diferente a outros.
As Administracións públicas apostan por potenciar un destino sostible onde a gastronomía e o turismo activo sexan os alicerces para mobilizar esta industria. Mar e terra, cultura e tradicións; proximidade a tres aeroportos, un deles internacional; e conexión ferroviaria con Madrid en tres hora e media, centro de peregrinación mundial á mesma altura de Roma, Xerusalén ou a Meca, forman un triángulo perfecto para dar a coñecer unha maneira de vivir onde a slow food e o contacto coa natureza suxiren unha clase de turismo lonxe de espazos xa masificados.
A importancia da gastronomía local, o produto de proximidade, mar e terra e unha elaboración axeitada axudarán a desestacionalizar este sector da industria.