Despois da presentación ao sector turístico, a publicación darase a coñecer o día 28 a todo o público
18 jun 2013 . Actualizado a las 07:00 h.Xan Fernández Carrera (Vimianzo, 1951) ten na cabeza unha enciclopedia histórica e etnográfica da Costa da Morte. Hai uns días presentou a Guía de Carballo, pero leva xa «unhas cantas» e ten algunha máis pendente de publicación. «É algo que me gusta e que seguirei facendo mentres teña ganas de traballar», asegura. Neste novo libro, que constitúe unha das pezas da campaña Carballo a un paso, Fernández Carrera afonda nos aspectos máis turísticos do municipio, pero tamén na súa historia, contada tanto para os visitantes como para os propios carballeses. Os interesados en coñecela poderán ter información de primeira man o día 28, no Casino, onde se fará un novo acto aberto a todos os cidadáns.
-¿Carballo dá para tanto como parece polo volume da guía?
-Si, por suposto, Carballo dá para isto e para moito máis. Non é que o núcleo urbano teña unha historia moi longa, pero as parroquias, como todas as de Galicia, teñen moita historia. O que quixen facer foi un libro que non fose exclusivamente dedicado aos turistas nin exclusivamente dedicado aos carballeses, senón unha cousa intermedia.
-¿Non lle chama a atención que tendo tanto que ofrecer non existira un traballo destas características ata agora?
-Ese foi un dos motivos que me levou a facela, porque, efectivamente, chama a atención. Así coma da Costa da Morte nestes últimos 15-20 anos publicouse moito material informativo, a maior parte dos concellos carecen de guías, mesmo concellos turísticos coma Fisterra ou Corcubión. E pensaba que en Carballo había a necesidade dun libro destas características.
-¿Que aspectos de Carballo cre que van sorprender máis?
-Eu creo que pode sorprender, sobre todo, a arte que se agocha nas igrexas. A maior parte delas conservan un patrimonio artístico moi importante, como Sofán, Sísamo, Entrecruces, Noicela, Lema, Oza... Hai moitas igrexas que realmente son moi interesantes e a maior parte teñen retablos moi ben conservados e nos que traballaron artistas importantes, e creo que é quizais o aspecto menos coñecido. Outro aspecto son as construcións civís dos pazos. Carballo ten os mellores pazos da Costa da Morte, algúns moi interesantes, como Vilar de Francos, no que podemos ver o proceso de evolución dun pazo, porque aínda se ve a torre medieval, que se conserva en moi poucos pazos porque o que se facía era tirala e construír unha casa cun modelo distinto e unha función distinta. E destacaría tamén paisaxes descoñecidas, sobre todo no interior, como a ribeira do Anllóns e os seus afluentes. Aínda quedan espazos moi fermosos que para moitos carballeses son aínda descoñecidos. Quero dicir que hai bastantes cousas aínda por descubrir.
-Para os carballeses, pero sobre todo para os visitantes.
-Eu creo que ás veces temos unha visión parcial do que é a realidade de Carballo, porque como o descoñecemos pensamos que non ten ese patrimonio, pero a medida que imos pateando o territorio dámonos conta de que hai moito que ver, as capelas, por exemplo. Unha que a min me encanta é a capela de San Paio de Entrecruces, que é moi bonita. Espero que esta guía axude aos carballeses a descubrir o seu propio concello, e ao mesmo tempo que sirva tamén para a proxección de Carballo para o exterior.