Estrearon esta fin de semana na Coruña, o venres estarán en Carballo, o sábado en Vimianzo e o domingo en Cee
05 mar 2023 . Actualizado a las 05:00 h.Carballo, Vimianzo e Cee • A compañía Talía Teatro vén de estrear esta fin de semana, cunha dobre función no Rosalía de Castro da Coruña, o seu último espectáculo: Unha inimiga do pobo. Trátase, indicaron na rolda de prensa previa a estas funcións, dunha adaptación contemporánea dun texto de Henrik Ibsen, que «procura facer reflexionar ao público sobre os grandes problemas sociais da actualidade». Dirixe Tito Asorey e soben ao escenario a fisterrá Marta Lado no papel de protagonista, Toño Casais, Dani Trillo, Rubén Prieto, Marta Ríos, María Ordóñez, Diego Rey, Artur Trillo e tamén Xurxo Barcala.
Iniciará agora Talía unha xira coa obra, na que a segunda parada, a terceira e a cuarta serán na Costa da Morte, posible grazas ao apoio da Rede galega de Teatros de Auditorios. O vindeiro 10 de marzo, dentro dos Venres Culturais, a cita será no Pazo da Cultura de Carballo: 20.30 horas. Un día despois, o sábado 11, estarán na programación do auditorio de Vimianzo, tamén ás 20.30. O domingo 12 de marzo Unha inimiga do pobo poderá verse en Cee, localidade con especial vínculo a Talía, neste caso, ás 19.00 horas. As entradas xa se poden mercar de forma anticipada.
E que trae a obra? A Helena, doutora de prestixio internacional que regresa á vila natal para comezar unha nova vida co seu compañeiro. Embarazada, afronta un novo proxecto profesional cun balneario que ela mesma deseñou. Pero a contaminación das augas e a súa loita pola saúde da xente fronte aos intereses económicos poñerana no punto de mira.