«Abecedario das mantenzas», un libro póstumo de Fausto Galdo sobre gastronomía

Ademais dun dos médicos humanistas de referencia, Fausto Galdo, falecido esta mesma semana, era autor dunha ampla obra escrita na que agromaban a medicina e a súa especialidade, a reuma, pero tamén intereses seus como a pintura ou a gastronomía. Neste último eido tiña ultimado un novo volume que publicará Edicións Xerais en breve e que Galdo chegou a ver en proba de imprenta.

O tomo, que leva por título Abecedario das mantenzas, traza un percorrido con vocación divulgativa polo acto de comer en Galicia, tomado dende a súa vertente de fenómeno social e cultural. Trátase dun dicionario que cataloga peixes, carnes, froitos da horta e viños, entre outros moitos alimentos, e como os galegos incorporaron tales mantenzas á súa cociña. Deste xeito, fálase de adubos e xeitos de cocción, que interesarán a quen se movan entre fogóns, pero ademais no libro hai citas de autores, cantigas, ditos e lendas tradicionais, proverbios e moitas outras manifestacións culturais sobre a gastronomía.

Galdo remóntase a Afonso X O Sabio e chega ata Rosalía de Castro e Álvaro Cunqueiro, este último, fonte de inspiración para Abecedario das mantenzas, un treito temporal no que se examina a perspectiva coa que os galegos se achegaron á comida e á cociña. Por último, na súa dobre condición de médico e gastrónomo, Galdo non esquece no libro tocar aspectos relacionados coa nutrición e como manter un equilibrio san a través da alimentación.

Como autor gastronómico Galdo foi distinguido como o Álvaro Cunqueiro á mellor labor en prensa e tamén polos seus libros.

---

---

---