Manuel Cuíña: «Este ano sairemos do paso e traballaremos xa para ter un 50 aniversario da Empanada como se merece»

Rocío García Martínez
rocío garcía LALÍN / LA VOZ

DEZA

Miguel souto

A nova directiva reunirase hoxe coa saínte para coñecer os compromisos adquiridos e programar «sen perder un minuto»

31 mar 2025 . Actualizado a las 05:00 h.

O ex alcalde de Silleda, Manuel Cuíña, converteuse este sábado en presidente da asociación Amigos da Empanada da Bandeira arroupado por cinco colaboradores que, coma el, sufrían coa idea de que o colectivo se disolvera. Cuíña é socio do colectivo desde as súas orixes, formou parte da comisión que organizou os festexos antes de que existira a asociación, hai 30 anos, e, sendo concelleiro de Cultura, no 2008-2009, xa formou parte da directiva noutro intre con risco de disolución.

—Que foi o que o levou a dar unha paso á fronte de novo?

—O 14 deste mes, cando houbo a dimisión da directiva e non se presentaron propostas de relevo, como moitos, marchei para a casa preocupado. O colectivo corría risco de disolución e non podía ser. E menos xusto no ano no que a festa foi declarada de Interese Turístico Nacional, co traballo que nos custou a todos. Contactei con outra xente que nalgunha ocasión xa estivera tamén na directiva e todos estiveron comigo. Visto que non había quen se presentase, decidimos botar unha man.

—Quedan pouco máis de catro meses para a data, cal é o plan de acción?

—O luns (por hoxe) temos unha reunión coa directiva saínte ás sete da tarde na Casa da Cultura, para poñernos ao día e saber se hai compromisos adquiridos. Queremos que sexa xa tamén a primeira reunión de traballo, porque estamos xa case en abril e non podemos perder nin un minuto.

—Como será a Festa da Empanada deste ano?

—Este ano sairemos do paso o mellor que poidamos. Faremos as mellores festas posibles, pero queda moi pouco tempo. Normalmente ao acabar unha festa xa se empeza a traballar na seguinte, pero esta vez non pode ser. A idea é facer unha festa coa estrutura de sempre: os dous festivais —o rock e o folk—, a empanada do sábado e festa o domingo. Empezaremos a traballar xa, pero ao tempo que traballamos para a festa deste ano empezaremos a traballar xa para a festa do ano que vén, para celebrar o 50 aniversario como se merece.

—Como ve o futuro da Empanada? Queda marxe para medrar?

—A nosa familia ten unha peña que chegou a ter máis de cen persoas. Cando empezamos coa reunión de peñas, era a cuarta parte de xente do que foi despois. 1.500 persoas parecían moitas para Bandeira e mira a onde chegamos, a 7.000 persoas... Bater moitos máis records de xente xantando á unha na carballeira é difícil, pero o importante é que siga sendo unha festa de referencia. Agora demos un pasiño máis coa declaración de Festa de Interese Turístico Nacional, que custou moito traballo, porque se empezou a traballar en serio no 2012 e houbo unha pandemia polo medio, pero non nos podemos conformar con iso.

—Van a pola declaración de Interese Internacional?

—É moi pronto para dicir iso. De momento temos que consolidar e seguir medrando, pero no futuro temos que chegar a máis. Cando conseguimos ser Festa de Interese Galego, quen se plantexaba ir máis alá?. No 2012 as persoas que estaban na directiva plantexárono. Custou pero conseguímolo. Agora o que toca é consolidar, seguir facendo a mellor reunión e lavar o nome da Festa da Empanada e o nome da Bandeira e de Silleda por todo o mundo.