Homenaxean ao director Ignacio Vilar por máis de cincuenta anos dedicados ao cine

Ignacio Vilar criouse nunha casa na aldea de Castrofolla, no concello ourensán de Petín, onde había unha lareira á que a cotío se achegaban os veciños para contar historias que aprenderan dos seus devanceiros. «Emocionábanme e pasaba meses dándolle voltas», recordou onte o director ao explicar o xerme da súa paixón por transmitir a través da palabra. «Cando vin a primeira película no cine Avenida da Rúa recordoume á lareira, porque se apagaban todas as luces e quedaba unha no centro», engadiu. Foi o xerme dun oficio ao que leva dedicados máis de 50 anos que deron lugar a títulos como Pradolongo, María Solinha ou A Esmorga.

Nunha vida dedicada ao cine tiveron moito que ver os moitos libros e películas que ten lido e visto. Con eles formou unha grande biblioteca que acaba de doar ao Instituto de Estudios Valdeorreses (IEV), que quixo agradecer o xesto organizándolle unha homenaxe. Será o sábado pola mañá na Casa Grande de Viloira no Barco, no mesmo edificio que albergará a colección doada por Vilar, formada por máis dun milleiro de libros e 400 películas. «O IEV é a posibilidade de ter todo nun lugar e espero que esta biblioteca sirva como un templo de formación para a fotografía e o cine», dixo Vilar. O presidente do Instituto, Aurelio Blanco Trincado, agradeceu o xesto porque pasará a formar parte dunha colección singular. Como remarcou o encargado do fondo bibliográfico da entidade, Julio Pérez, ata O Barco achéganse estudosos da comarca pero tamén de fóra dela e incluso de fóra de Galicia para buscar información en libros que só aquí poden atopar.

---

---

---