![](https://img.lavdg.com/sc/nzT4QyNz0uO7x7SqT8pbnq_Wvu4=/480x/2024/06/25/00121719345481635337633/Foto/GJ26P53F1_215616.jpg)
![](https://img.lavdg.com/sc/djXIxJ1Ku2VaH-2CdqzzinlqhmI=/480x/2024/06/25/00121719346442067702463/Foto/S_20240625_211627001.jpg)
![](https://img.lavdg.com/sc/TuLgRlXcdvncBiy18sksy1jj3no=/480x/2024/06/25/00121719346321659248333/Foto/S_20240625_211926000.jpg)
![](https://img.lavdg.com/sc/s9ELmTsZGTDyb8g0aqt-yaVkKmE=/480x/2024/06/25/00121719346562105278508/Foto/S_20240625_211908000.jpg)
![](https://img.lavdg.com/sc/-POg4w5helvV75Gfz914GymenCg=/480x/2024/06/25/00121719346381921763289/Foto/S_20240625_211804000.jpg)
![](https://img.lavdg.com/sc/-USzd5elkufsy-xwDrZUCIczlv4=/480x/2024/06/25/00121719346622451570130/Foto/S_20240625_211645000.jpg)
![](https://img.lavdg.com/sc/1bsWrcCLIIMq4vcATPM72Ywxrv4=/480x/2024/06/25/00121719346562884693736/Foto/S_20240625_211857000.jpg)
![](https://img.lavdg.com/sc/MAB5iXlfkQzhR4Z8V9aJ2ZObOh4=/480x/2024/06/25/00121719346381422483192/Foto/S_20240625_211754000.jpg)
A TVG emite de martes a xoves a terceira temporada da serie
26 jun 2024 . Actualizado a las 05:00 h.Saber se Celia marcha finalmente ou non en pantalla grande é outra experiencia. A que se viviu onte na preestrea en Santiago da terceira temporada de Saudade de ti, a serie producida por Voz Audiovisual que se emitirá na TVG de martes a xoves. O equipo artístico e mais o equipo técnico déronse cita nos cines As Cancelas para celebrar o regreso dunha serie que espertou grande expectación sobre que deparará a relación entre Celia, Santi e Raúl.
Tanto, que María Tasende (Celia), Fran Nogueira (Raúl) e Adrián Castiñeiras (Santi) atrevéronse cun playblack de Dos hombres y un destino, aquel tema de Bustamante e Àlex Casademunt, para celebrar o regreso de Saudade de ti, que pechou a segunda tempada con 116.000 espectadores de media e un 14,4 % de share.
Celia «vai gozar dunha serenidade que non tivo noutras tempadas e toma certas decisións e aposta por determinadas cousas na súa vida, como ir vivir coa súa parella». Explicábao unha María Tasende que xa ve como o personaxe empeza a ter entidade propia logo de interpretalo durante tres tempadas. Agora, Celia deberá enfrontarse á realidade da convivencia coa súa parella, que «non resulta tan idílica como un pensa. A realidade», explica.
«É como se collera vida propia e decide o personaxe e non ti como actriz», explica a protagonista, que despois de convivir durante tantos capítulos con Celia «teslle respecto e cariño, é alguén a quen queres, deféndelo a morte» e ademais «vólveste comprensiva; oxalá foramos así de comprensivos con nós mesmos».
O mesmo lle acontece a Manuel San Martín, que encarna a Gaspar por terceira tempada. «A medida que pasa o tempo sénteste máis cómodo co personaxe» pero boa parte do mérito «é dos guionistas, que fan que o personaxe pase por diferentes fases» e de feito «non nos dan marxe para aburrirnos, son personaxes moi completos».
San Martín está encantado con Gaspar, «que como sempre, recibe e dá» nos 60 capítulos que se emitirán ao longo deste verán. «Ten un corazón duro e comeza pasándoo mal, pero el sabe esperar as súas oportunidades para devolver o golpe».
Pero ademais de personaxes xa ben coñecidos, esta terceira tempada de Saudade de ti tamén traerá novas tramas, como a da construción dun novo porto deportivo na vila que divide á veciñanza e xerará novos conflitos e algún que outro susto, e novos personaxes. Denís Gómez será Pedro, un avogado que chega de Vigo a Abrente e, malia que «aparentemente ten boas intencións», os veciños da vila non saben do seu pasado, das súas débedas pendentes que ten que saldar con moitos personaxes, incluíndo a Celia e mais a Gaspar.
«É un tipo astuto, simpático, afable, pero usa esa simpatía e esa intelixencia no seu propio beneficio. O problema de Pedro é que cre que o fin xustifica os medios, sempre», explica Gómez. «A todos os actores nos gustan os papeis que non indican ás primeiras como é o personaxe», di sobre o seu traballo de interpretación de Pedro. Que agoche algo «dános un espectro de emocións e un cadro co que traballar moito máis amplo».
Interpretar a Pedro é un reto «moi divertido», igual que é un desafío o ritmo que supón unha serie que se emite varias veces á semana —de martes a xoves despois do renovado Atrápame se podes e tamén na plataforma AGalega.gal dende hoxe— e que «a priori sempre asusta», pero ao que o corpo e a mente acaban adaptándose.