Doce citas afianzan Vimianzo como referente cultural

ANA GARCÍA

Vimianzo afiánzase referente cultural e, o seu auditorio, na Casa da Cultura, espazo de referencia para as artes escénicas. É o que se desprende do feito de que a compañía aAntena fixese aquí residencia para o seu máis recente espectáculo, Sol Fuerza, ou de que o Colectivo RPM vaia volver a Soneira coas súas Residencias Paraíso. Despréndese tamén do feito de que o Centro Dramático Galego elixise a localidade para unha das súas saídas a auditorios de Galicia, neste caso coa peza Manuela Rey is in da house, a historia dunha relevante muller para as artes escénicas galegas que houbo de marchar a Portugal. Entre este venres 14 de febreiro, cunha cita para alumnado do instituto Terra de Soneira, e o 10 de maio, haberá catro meses de programacion para adultos, presentada pola técnica Nieves Lema; a edila de Cultura, Rosa Blanco, e alcaldesa, Mónica Rodríguez.

Ampla e variada

«Coma sempre, temos un pouquiño de todo. Temos cine, temos teatro, temos danza... Temos obras novas e queremos tamén sobre todo darlle visibilidade a actores e actrices da comarca. Tamén a temáticas como poder ser a emigración, no caso da obra de Tarabela Creativa», apuntou a concelleira. Foi Nieves Lema a encargada de ir debullando as diferentes propostas, todas para maiores de 12 anos, en tanto que o almanaque infantil darase a coñecer un pouco máis adiante. Diversidade e variedade, incidiu do seu lado a rexedora, facendo fincapé no caso da consolidación de Vimianzo como residencia para a creación cultural. Agradeceu Rodríguez a todo o equipo humano que fai posible estas propostas, así como a colaboración do Ministerio de Igualdade, a Deputación, a Rede Galega de Teatros e Auditorios ou o Centro Dramático. As entradas pódense mercar en woutick.es ou na propia Casa da Cultura.