Os 3.000 pratos de polbo á mugardesa irán acompañados de 3.000 pratos de empanada nesta tradición
11 jul 2025 . Actualizado a las 05:00 h.Tanto amor amosa Mugardos polo polbo que ata os seus veciños seleccionan as mellores camisolas para exaltar tan suculento cefalópodo. Xa na pasada edición desta Festa do Polbo, que chega á súa 33 edición este sábado, houbo ata peluchiños e gorros que simulaban os oito brazos deste intelixente (e saboroso) animal. Recorda a concelleira de Cultura e Turismo, Begoña Gómez, que «temos unha longa historia de exaltación do polbo mugardés».
Que ten de especial o prato que preparan en concreto en Mugardos? «Pois que é único no mundo, non atoparás unha preparación similar no resto do planeta», indica a edila. E a continuación, enumera con precisión a receta: «Ti fas un sofrito con cebola, allo, pemento roxo, pemento verde... e despois acabas de guisar o polbo nesa salsa».
Nesta cita organizada polo Concello, haberá 1.900 quilos deste «manxar único» que se repartirán entre 3.000 racións. Ademais, haberá outras 3.000 racións de empanada. «O polbo á feira faise en calquera parte de Galicia, pero o polbo á mugardesa só se fai aquí», reitera a concelleira. Claramente, tan rico prato convertiuse «nun dos atractivos turísticos da vila, con este evento que é un dos máis importantes de todo o ano».
A cita gastronómica sempre coincide co segundo sábado do mes de xullo, e serve de aperitivo ás tamén famosísimas festas do Carme que se celebrarán na seguinte fin de semana.
Os mugardeses, as mugardesas e os seus veciños teñen aínda máis troula por diante. Como indica a concelleira do ramo, Begoña Gómez, «as festas do Carme serán os días 18 e 19, o venres teremos dous tributos con Virtual Project con versións dos grupos dos 70 e MU2 que versionan aos irlandeses U2».
E o sábado chegan as verbenas coas orquestras Origen e Pasión. O 20 de xullo haberá tardeo con Nunzia e Javi Rey no Cantón de Cora. En canto ao turismo, «xa se está notando desde xuño que chega moita xente, en canto empeza a facer calor a xente xa escapa para aquí». Veñen moitos visitantes mesmo a pasar o mes enteiro, «en alugueiros ou en segunda residencia».