Arranca a quinta edición do programa 21 días co galego con máis de 4.500 participantes de doce centros educativos
GALICIA
A iniciativa busca promover o uso do galego oral entre a rapazada e a mocidade do país
24 ene 2023 . Actualizado a las 16:26 h.Este martes botou a andar a quinta edición do programa 21 días co galego e +, que busca promover o uso da lingua galega entre a xente nova. Este ano participan na iniciativa 4.564 persoas (un 20 % máis que o ano pasado) entre alumnado, profesorado e persoal de administración e servizos dos doce centros educativos participantes.
Baixo o lema Falando para un mundo mellor, que motiva á rapazada a medrar no uso do galego, o alumnado do último ciclo de Primaria, de ESO, de Bacharelato e de FP intensificará voluntariamente a súa expresión en galego durante os 21 días que funcionará o programa. Diso quedará constancia no blog 21diascogalegoemais.gal, o soporte central da iniciativa no que se mostrarán as creacións dos centros participantes, aínda que tamén poderá seguirse a actividade relacionada nas contas de Facebook, TikTok, Instagram e Twitter.
O programa, impulsado pola Consellería de Cultura, Educación, FP e Universidade, busca aumentar e perfeccionar o uso oral do galego, e mover á reflexión persoal sobre a relación que cada persoa ten coa lingua propia de Galicia e co resto dos idiomas que coñece. Os centros participantes irán surtindo o blog e as redes con distintas propostas para se achegar ao galego e á cultura de Galicia.
Ademais, a iniciativa terá unha sección diaria de luns a venres durante tres semanas no programa Galicia por diante, da Radio Galega, e tamén haberá unha colaboración co programa Dígocho eu! da CRTVG, que terá encontros co alumnado dos centros participantes.
O acto de apertura oficial do programa tivo lugar este martes no IES Rafael Dieste da Coruña, coa participación do secretario xeral de Política Lingüística, Valentín García; o presidente da Real Academia Galega, Víctor F. Freixanes; e a profesora e creadora da iniciativa Pilar Ponte.