O xacemento foi liberado da maleza que o cubría para facelo accesible ás visitas
28 jul 2020 . Actualizado a las 19:47 h.O campo xuvenil de Quiroga que traballou no acondicionamento do castro de Penadominga, na localidade de Bendollo, rematou onte de forma oficial. Este campo de voluntariado da Xunta comezou a desenvolverse o pasado día 16 e desde esa data os oito mozos e mozas galegos participantes dedicáronse a retirar a vexetación que cubría desde hai moito tempo o antigo asentamento. Son case trinta os castros que se poden atopar no municipio de Quiroga e todos eles, desde hai anos, están cubertos pola maleza. A actuación do grupo de voluntarios que traballaron no castro de Penadominga tiña por obxectivo facelo accesible ás visitas turísticas, polo que as principais tarefas levadas a cabo consistiron na limpeza e habilitación do acceso ao xacemento e a sinalización e acondicionamento dunha ruta de sendeirismo que leva ate este lugar.
Visitas virtuais
O proxecto comprende ademais a creación dunha páxina web e unha ruta virtual onde se mostra a cartografía, a planimetría e o perfil do percorrido. Do mesmo xeito, foron dispostos códigos QR xeolocalizados para ofrecer información sobre a flora, a fauna e os principais puntos de interese da zona.
Segundo explican os responsables municipais, estes traballos realizáronse polas mañás. Durante as tardes, os voluntarios do campo xuvenil participaron en actividades de carácter cultural e recreativo, como visitas ás instalacións do museo etnográfico municipal ou á adega EDV, nas que estivo presente a concelleira de Xuventude, Ana Lucía Nogueira.
A situación creada este ano pola emerxencia sanitaria provocou unha redución no número de voluntarios, ademais de pechar a posibilidade de participación internacional que se dera outros anos. Así, esta edición foi de ámbito exclusivamente autonómico e foron oito persoas as que realizaron estes traballos de acondicionamento. Os campos de traballo de anos anteriores enfocáronse noutros lugares de interese histórico e cultural de Quiroga como son un tramo do Camiño de Inverno ou o castelo dos Novaes, entre outros.
No castro de Penadominga non se levou a cabo ata agora ningunha investigación, a pesar do cal está considerado como un dos puntos de maior interese arqueolóxico do municipio de Quiroga. Desde a década de 1950 producíronse no antigo asentamento varios achados fortuítos de pezas de notable valor que foron depositadas no seu día no Museo Provincial de Lugo.
Intervencións similares
Durante os últimos anos, grazas tamén aos campos xuvenís de traballo financiados pola Xunta, no veciño municipio de Folgoso do Courel rozáronse outros castros que estaban ocultos pola maleza na súa maior parte. Estes asentamentos son os de Vilar, Sobredo e Vilamor.
Arranca en Vilachá unha nova campaña de escavacións
No municipio da Pobra do Brollón comezou a segunda campaña de escavacións no xacemento arqueolóxico dos Conventos, situado na parroquia de Vilachá de Salvadur. Os traballos, que durarán ata o 20 de agosto, encádranse no proxecto Adegas da Memoria, promovido pola asociación veciñal da parroquia en colaboración co Concello e co apoio da Dirección Xeral do Patrimonio Cultural. A súa finalidade consiste en localizar vestixios do desaparecido mosteiro medieval de San Martiño de Piñeira, mencionado en varios documentos históricos.
Durante a semana pasada, por outro lado, o lugar foi visitado por persoas procedentes de diversas localidades dentro dun programa de turismo cultural promovido polo Concello da Pobra do Brollón. Se ben as escavacións non estaban aínda en marcha, durante os últimos días os arqueólogos limparon de maleza toda a área onde se levarán a cabo os traballos, poñendo ao descuberto restos de diversas construcións, polo que os visitantes puideron apreciar o conxunto arqueolóxico, dividido en oito espazos separados por muros de pedra.
O arqueólogo Xurxo Ayán, director técnico do proxecto, sinala que os traballos que se levarán a cabo na nova campaña comprenden, por unha parte, unha sondaxe na área onde se supón que estaba a entrada do recinto do antigo mosteiro, onde apareceu unha grande cantidade de pedras e entullo. Por outra parte, escavarase tamén unha zona onde na campaña do ano pasado apareceu un enterramento humano que foi datado no século X. Os investigadores localizaron indicios que fan supoñer que nesa zona pode haber outras dúas antigas sepulturas.