A organización galega apoia as demandas trasladadas por ASAJA ante o comisario europeo de Agricultura
17 may 2025 . Actualizado a las 11:44 h.A Asociación Agraria de Galicia (ASAGA) sumouse ás reclamacións de medidas efectivas para o campo formuladas desde os órganos da Unión Europea. A entidade galega apoia as peticións que o presidente da Asociación Agraria de Jóvenes Agricultores (ASAJA), Pedro Barato, trasladou este mércores ao comisario europeo de Agricultura, Christophe Hansen.
Durante o encontro, Barato expresou a preocupación do sector agrario español ante o paquete de simplificación da PAC presentado pola Comisión Europea, centrado na redución da carga administrativa, os controis, a aplicación, a resposta ante crises e as necesidades de investimento. A Comisión postula estas medidas como unha vía para mellorar a competitividade.
Malia agradecer os avances no eido burocrático e o apoio a pequenas e ecolóxicas explotacións, Barato insistiu na necesidade de actuar en beneficio dos profesionais da agricultura, coincidindo co expresado por representantes doutros países como Italia, Croacia, Francia, Grecia e Portugal. ASAJA advertiu que a simplificación administrativa non debe encubrir a falta de ambición orzamentaria: «Primeiro o orzamento e logo as medidas. Sen orzamento, non hai política útil», manifestou Barato, sinalando que non se trata de crear novos fondos senón de garantir que os xa existentes cheguen aos agricultores reais.
As organizacións participantes destacaron o carácter dialogante do comisario Hansen, mais reclamaron a necesidade dun orzamento sólido, a preservación dos piares da PAC e o rexeitamento a fondos únicos que poidan encubrir recortes.
Antes da reunión, o Parlamento Europeo acolleu a xornada «A agricultura nos países do sur de Europa», organizada polo Partido Popular Europeo. O evento reuniu representantes de organizacións agrarias de varios países do sur continental e da Dirección Xeral de Agricultura da Comisión Europea. O programa abordou temas como a escaseza de auga, a despoboación, o exceso de burocracia ou as desvantaxes estruturais na cadea de valor, entre outros. Tamén se debateu sobre a viabilidade da PAC actual como garante da rendibilidade das explotacións.