A falla de subministro de madeira de pino preocupa aos serradoiros galegos

Os serradoiros son empresas que traballan coa vista posta no futuro. Porque a súa materia prima non é algo que se poida conseguir dun día para outro, senón que hai que agardar anos por ela. Precisamente por esa circunstancia, un grupo de 66 empresas do sector, que representan o 90?% da transformación do piñeiro en Galicia, trasladou á Xunta a súa preocupación pola falta dun subministro estable de piñeiro. Téñenlle medo a que, debido a enfermidades como as bandas ou o nematodo, nun prazo non superior a dez anos, o abastecemento desta materia prima estea comprometido.

«O piñeiro está ameazado en Galicia. No norte, polas bandas; no sur, polo nematodo. E iso preocúpanos moito», explica un dos asinantes do documento. Por iso reclaman á Xunta que poña en marcha medidas fitosanitarias efectivas que axuden a controlar o avance destas pragas.

Ademais, o sector tamén considera que as existencias de piñeiro en Galicia se teñen reducido nos últimos anos debido ao avance do eucalipto. Así, sen «estar en contra das plantacións», consideran que «a moratoria debería manterse vixente, como medida para potenciar e protexer as plantacións de piñeiro». En caso contrario, temen que a súa materia prima poida comezar a escasear nun prazo de dez anos.

Aínda que actualmente as empresas si atopan subministración de madeira de piñeiro, explican que «Galicia é mar e monte e debemos coidar os nosos recursos. Estamos preocupados porque somos empresas que precisamos planificar a moi longo prazo e facer investimentos». O problema «é que as pragas van máis rápido cas motoserras», engaden. De aí que teman que nunha serie de anos, se as bandas seguen estendéndose, comecen os problemas de subministración. Por iso reclaman ás administracións que tomen medidas para frear esta situación. «Somos unha industria que xera valor no rural e non se nos pode deixar desaparecer», conclúen os serradoiros.

Un sector que crea 7.400 empregos no rural e transforma 3,5 millóns de metros cúbicos

Os serradoiros tamén queren chamar a atención sobre a súa importancia para o medio rural, pois actualmente producen o 40?% da madeira serrada de toda España, cunha facturación de 365 millóns de euros anuais e a creación de 7.400 empregos directos. Son, en total, 120 empresas asentadas no rural que transforman 3,5 millóns de metros cúbicos de madeira de piñeiro, pola que os propietarios forestais reciben máis de cen millóns de euros ao ano. «Estamos asentados no medio rural, onde temos un importante impacto a nivel económico, social e medioambiental», explican os serradoiros.

O sector tamén lle explicou ás consellerías do Medio Rural e de Economía e Industria a súa intención de seguir apostando polo entorno rural. Actualmente, o 52?% desta industria está situada na provincia da Coruña, o 20?% na de Lugo, o 15?% en Ourense e o 13?% en Pontevedra. E, segundo os datos do Instituto Galego de Estatística, o 95?% dos concellos galegos contan cunha industria forestal. Esta representa o 50?% do emprego industrial que existe en municipios como Alfoz, Coles, Piñor, Pontedeva, Quintela de Leirado ou Sarreaus.

Dos 3,5 millóns de metros cúbicos que procesan ao ano, máis do 95?% é piñeiro, destinado á fabricación de produtos esenciais para as industrias do taboleiro, a carpintaría, o mobiliario, a construción ou o consumidor final. Tamén destaca a súa achega a outros sectores produtivos, como as caixas de madeira para a pesca ou as bateas para o sector do mexillón.

Pero sen dúbida unha das características máis importantes desta industria é que promove a fixación de poboación no rural, xerando emprego de maneira directa e tamén indirecta, ao demandar servizos doutros negocios auxiliares. É unha industria con máis de 180 anos de historia, que pode presumir de ter traído tecnoloxías, infraestruturas, vías de comunicación e mesmo servizos como a electricidade ás comarcas rurais. Pero tamén é un sector moderno, que aposta pola sostibilidade consumindo madeira certificada con selos forestais, e que favoreceu a incorporación da muller, primeiro a tarefas administrativas e, agora, a postos de dirección.

---

---

---