A acción desenvolveuse no Bohído con semente procedente do criadeiro do Vicedo
18 nov 2025 . Actualizado a las 05:00 h.A Consellería do Mar e a directora xeral de Desenvolvemento Pesqueiro, Ángeles V. Suárez, participaron por segunda vez en menos dun mes nunha operación de sementeira de ameixa no banco do Bohído, un espazo de libre marisqueo na ría de Arousa. Suárez e o seu equipo trasladáronse ata o porto de Tragove, dende onde partiron rumbo a sementar un total de 130.000 unidades da especie babosa procedentes do criadeiro do Vicedo, dependente do CIMA de Ribadeo, ao longo dunha superficie total de 500 metros cadrados.
Trátase dunha acción destinada a restaurar a biodiversidade dos ecosistemas mariños e de apoio ao libre marisqueo. Segundo Suárez, a Xunta amosa con accións coma esta «o compromiso coa protección do medio mariño e a economía azul», ademais de mediante a inclusión nos Orzamentos para o ano 2026 dunha partida de 3.975.000 euros para «a explotación sustentable dos recursos, a mellora das zonas de produción e protección dos ecosistemas, e as paralizacións temporais». Precisamente este punto da ría está agora mesmo en veda e tocaralle repousar no primeiro trimestre do 2026, polo que as mariscadoras recibirán as correspondentes compensacións económicas.
A finais de outubro, a Consellería protagonizou unha iniciativa idéntica, sementando nesa ocasión 57.550 unidades de babosa. Dende maio do 2022 sementáronse no banco do Bohído 337 quilos de xuvenís de ameixa, ou o que é o mesmo, 1.088.534 unidades, correspondendo a meirande parte a babosa: 1.061.334 unidades ou 316,65 quilos. Durante o período 2023-2025 estes traballos de recuperación dos bancos marisqueiros supuxeron unha inversión total de 6.620.637 euros, cofinanciados mediante fondos europeos.