A exposición «Cornamusas primitivas e iconografía da gaita» percorre a evolución deste instrumento musical desde o século VI, cun estudo tamén dedicado á provincia. Pódese visitar ata o 10 de maio en Afundación
10 mar 2025 . Actualizado a las 21:04 h.Mergullarse na historia da gaita, un instrumento tan vencellado á cultura galega, é tamén percorrer os últimos tres mil anos de historia da humanidade entre Europa, Asia e África. Esta viaxe no tempo é a que propón a exposición Cornamusas primitivas e iconografía da gaita, que repasa a historia deste emblemático instrumento musical e que se pode visitar ata o 10 de maio na sede lucense de Afundación. A mostra parte da representación máis antiga que hoxe se conserva do instrumento, no conxunto escultórico sobre rochas de Taq-i-Bostan (Irán), e tamén dedica un capítulo especial á iconografía da gaita na provincia de Lugo.
Hai máis de 2.600 anos que se representaban as cornamusas na antiga Persia e, durante séculos, o seu humano expandiunas polo planeta e foilles dando diferentes formas e nomes. A historiadora e música Ruth Foxo e o musicólogo e director da Real Banda de Gaitas da Deputación de Ourense, Xosé Lois Foxo, comisarían a exposición, que busca «volver a mirada introspectiva ao enxeño creador dos séculos». A mostra tamén aproxima ao público o «valiosísimo documento», sinala Ruth Foxo, que conforman as diferentes denominacións da gaita «en cada rexión cultural». A gaita chega aos tempos actuais desde «a máis remota antigüidade», e cada pobo e cada cultura déronlle a súa pegada morfolóxica e tímbrica. A viaxe que plantexa a exposición é tamén un percorrido, a partir da gaita, por terras como as actuais Suecia, Xeorxia, Romanía, Croacia, Tunisia, Irán, Turquía, Malta, Ucraína ou España.
A cornamusa nace, lembra Ruth Foxo, coma un «mero desenvolvemento da frauta de cana simple» para chegar «desde culturas como a exipcia e a persa ata outras como a grecolatina», estendéndose por Europa, África e Asia.
O equipo didáctico deseñou unha visita guiada con obradoiros adaptados ás diferentes idades dos escolares, nos que descubrirán a importancia da música na historia e na sociedade, o valor das vestimentas e a transcendencia que este instrumento tivo na conformación da nosa cultura.
Por outro lado, a exposición forma parte do programa solidario «Cultura por alimentos», da Obra Social de Abanca, en colaboración coa Federación Española de Bancos de Alimentos. Por iso, os visitantes poderán depositar alimentos non perecedoiros nos contedores habilitados.