Abraham Cupeiro, en concerto en Lugo: «Aínda quedan moitas curiosidades por descubrir na historia da música»
LUGO
O mulitiinstrumentista sarriano actuará o 16 de maio presentando o seu novo disco, «Loira», que recupera instrumentos esquecidos e historias de xente humilde
02 abr 2025 . Actualizado a las 05:00 h.O polifacético artista Abraham Cupeiro (Sarria, 1980) está inmerso en dúas xiras: a de Mythos, que presentou no 2024, e a de Loira, un disco que sairá en formato dixital a finais de abril, e en formato físico o mes que vén. Este último traballo é o que presentará o próximo venres 16 de maio en Lugo, no Auditorio Municipal Fuxan Os Ventos, ás 21.00 horas. As últimas entradas dispoñibles aínda se poden adquirir a partir de 22 euros na páxina web entradas.ataquilla.com.
Cupeiro é un músico, compositor, construtor e multiinstrumentista especializado na recuperación de instrumentos ancestrais e sons esquecidos. Os seus espectáculos propoñen viaxes sonoras a través do tempo e a diversidade cultural. O seu traballo fusiona a tradición coa innovación, levando a escena instrumentos de épocas remotas, como o kárnix, o aulos ou a corna, en combinación con formacións contemporáneas. Colaborou con orquestras de prestixio, como a Royal Philharmoic Orchestra e a Orquestra Sinfónica de Galicia, ademais de participar en bandas sonoras, como a de Gladiator 2, gravar nos prestixiosos estudos londinenses de Abbey Road e publicar discos como Os sons esquecidos, Pangea ou Mythos, ao que se suma agora Loira.
—Como é este novo espectáculo?
—Este novo disco, Loira, non vai ser con orquestra, senón que se trata dunha miscelánea de temas que teño de diferentes estilos e épocas. O nome de Loira vén dunha cadela que teño, que adoptei tras atopala á saída dun bar. Leva dez anos comigo, é cega e mestiza e encántalle a música. Loira saía moitas veces nos vídeos que fixen durante a cuarentena, gustáballe posar ante a cámara, e moitos dos temas deste novo disco saíron precisamente dese período, da cuarentena.
—Como será o concerto de Lugo?
—Será un concerto con temas dispares, con pezas que pasan da euforia ao recollemento, unha antoloxía de temas perdidos nun caixón desde hai anos... É unha historia de instrumentos esquecidos no tempo, como a Corna de Tallón, que ao mellor foi dun pastor, ou un saxo do século XIX, pero tamén máis modernos. Trátase, a veces, de instrumentos rescatados de pequenas tendas ou mesmo de contedores de lixo. Este é, ante todo, un disco con historias de xentes pobres, de persoas moi humildes, das clases máis baixas de distintas culturas do mundo. Ademais, o espectáculo conta co traballo dunha equipa de músicos excepcionais: Matthew Ward e Davide Salvado, nas voces; Alba Barreiro, na arpa; Cibrán Seixo, no violín; Antonio Cienfuegos, no contrabaixo; e Sabela Caamaño, no acordeón.
—Quédanlle aínda moitos instrumentos por descubrir?
—Cada vez quedan menos, pero aínda hai moitas historias e moitas curiosidades por descubrir na historia da música. Os tinkers, por exemplo, os nómadas irlandeses, tamén teñen presenza neste novo disco. E resulta fascinante ir coñecendo como os instrumentos se foron abrindo paso a medida que ía avanzando a tecnoloxía e á par que cambiaba a sociedade.
—Está tendo máis concertos en Galicia nestes últimos meses?
—Estou tendo máis concertos ca nunca en xeral, o ano pasado rocei os 130 e este ano será similar, pero intento non pasar nunca dos 130 concertos. As próximas actuacións previstas para a presentación de Loira serán o día 3 de maio en Ourense; o 16, en Lugo; o 24, en Pontevedra; o 25, en Ferrol; o 6 de xuño, na Coruña; o 20 de decembro, en Vigo; e o 26 de decembro, en Santiago de Compostela.