A Xunta valida a contratación a Astilleros Polináutica de dúas patrulleiras para Gardacostas
![Pablo Penedo Vázquez](https://img.lavdg.com/sc/e0x1r55z20hoKh-0KynX5YLKJuk=/75x75/perfiles/187/1623079114415_thumb.jpg)
SOMOS MAR
![](https://img.lavdg.com/sc/sYEcQAbknKrI22xabnWkjxOu618=/480x/2024/06/11/00121718120401957471799/Foto/AJ12C4F1_173932.jpg)
A firma cambadesa faise cun contrato por valor de 2,9 millóns
12 jun 2024 . Actualizado a las 04:50 h.O Consello da Xunta de Galicia analizou na súa reunión semanal deste pasado luns a formalización do contrato de subministración de dúas embarcacións patrulleiras lixeiras para o Servizo de Gardacostas de Galicia. Un contrato concedido á empresa de Cambados Astilleros Polináutica S.L. cifrado en 2,9 millóns de euros, o 70 % a cargo do Fondo Europeo Marítimo, de Pesca e Acuicultura (Fempa) da Unión Europea.
O estaleiro arousán deberálle entregar a primeira embarcación ao Servizo de Gardacostas en 14 meses, e en 21 meses a segunda. Os dous buques terán por destino a substitución das patrulleiras Serra de Faro IP-122, con base en Portonovo, e a María de Pazos IP-123, asentada en Portosín, ambas as dúas, cunha antigüidade que rolda os 20 anos. As naves serán de tipo monocasco cabinado construído en poliéster reforzado con fibra de vidro e acabados do máis alto nivel de calidade. Cunha eslora de 18 metros, estarán preparados para acadar unha velocidade de 34 nós cun desprazamento de media carga.
A fabricación dos dous buques enmárcase no plan de renovación que a Consellería do Mar, departamento do que depende o Servizo de Gardacostas de Galicia, ten en marcha desde o 2018 e que deu pé desde entón á substitución de seis das oito unidades da súa frota de patrulleiras lixeiras e mais da súa única patrulleira de altura, coa Mar de Galicia xubilando a Paio Gómez Chariño. Un proceso no que Mar leva investidos máis de 13 millóns de euros.
Con este novo contrato, Astilleros Polináutica S.L. elevará a once o seu número de embarcacións fabricadas para Gardacostas, con tres patrulleiras de 13,4 metros de eslora e 920 cabalos de potencia e unha planeadora entre os transportes botados desde as súas gradas da parroquia cambadesa de Castrelo.
Servizo único a nivel autonómico en España, Gardacostas de Galicia conta a maior parte das súas intervencións por remolques doutros buques á deriva, tanto de pesca coma de recreo debido a avarías ou accidentes, e por operacións de rescate de persoas desaparecidas ou en perigo. Con todo, os seus medios, con especial protagonismo das súas patrulleiras lixeiras, serven tamén como unha das principais armas na loita contra o furtivismo no mar, combatendo a actividade ilegal no sector pesqueiro e evitando a venda de produtos alimenticios sen as debidas garantías sanitarias e legais.