A Xustiza ve mala fe nas ampliacións de capital de Atunlo Cambados e O Grove

Poucos meses antes de solicitar o concurso de acredores, en Atunes y Lomos SL (Atunlo) houbo varios movementos societarios e ampliacións de capital que a administración concursal en mans da que caeu o procedemento, ADV Concursal y Pericial, considerou cando menos sospeitosos, toda vez que descapitalizaban a sociedade e prexudicaban tanto á matriz como aos seus acredores, mentres que beneficiaban a unha serie de persoas relacionadas entre si. As súas sospeitas, que acabaron nos tribunais, foron confirmadas pola xuíza da sección número 3 do Xulgado do Mercantil de Pontevedra, que nunha sentenza ditada este xoves declara a nulidade e ineficacia das ampliacións de capital levadas a cabo en Atunlo Cambados (hoxe Frigoríficos Cambados) en marzo do 2024 e en Atunlo O Grove apenas un mes despois. Ademais declarou a perda do dereito de repetición do metálico invertido a tres das filiais da compañía: Comercial Pernas (Coper), Semellingreen e Tonno del Pacífico, esta última constituída apenas dous meses antes de facérense eses movementos no capital social.

A xuíza ten claro que esas operacións foron fraudulentas e se fixeron con mala fe, sen coñecemento da propia concursada e ás costas dalgúns dos socios —como Inpesca, por exemplo—, e cun claro interese particular, infrinxindo deste xeito o esixido deber de lealdade coa que deben conducirse os administradores sociais.

As ampliacións de capital foron un sálvese quen poida, polo que condenan a pagar as costas do proceso a Semllingreen, a Tonno del Pacífico e Comercial Pernas, pola súa cooperación necesaria. Segundo recolle a sentenza, antes de realizar os movementos societarios, a matriz Lomos y Atunes —formada por Inpesca (40 %), Marpesca (20 %) e Coper (40 %)— tiña o 65 % do capital de Atunlo O Grove e a mesma porcentaxe en Atunlo Cambados. Esta última, ademais, era una sociedade de natureza limitada unipersonal cuxo capital pertencía integramente a Atunlo O Grove, en mans de Atunes y Lomos (65,44 %) e Don Eleuterio, e a Susimar (34,56 %).

O 22 de marzo do 2024, ante notario, elevouse a pública a perda de unipersonalidade de Atunlo Cambados e unha ampliación de 2,6 millóns de euros, co que o capital social pasou a ser de 5 millóns, 2,4 en mans de Atunlo O Grove, que renunciou ao dereito de subscrición preferente, e o resto nas de Coper e Tonno del Pacífico, con 1,3 millóns cada un. Curiosamente, Tonno del Pacífico, constituída apenas dous meses antes con 3.100 euros de capital social, concorre a unha ampliación por importe de 1,3 millóns. E todo isto sen que se puidese aportar a acta da xunta de accionistas na que se aprobou á operación.

Sociedade pantalla

En canto aos movementos en Atunlo O Grove, foron de 16.500 euros, pero cunha prima de emisión de 985.000 euros subscrita entre Smellingreen e Tonno del Pacifico. Tras a operación, Atunlo, que ata entón tiña o 65,44 % das participacións sociais, reduciu o seu peso ata o 13,08 %. Tampouco hai acta da xunta de accionistas.

A xuíza tampouco pasa por alto que hai relación, incluso lazos familiares, entre as persoas que protagonizan as operacións mercantís e fala abertamente de sociedades pantalla, como no caso de Smellingreen. «Neste caso concorre o elemento subxectivo, de mala fe e fraude por parte de quen coa súa conduta provocaron a nulidade destes negocios xurídicos de ampliación de capital. As partes implicadas nas devanditas ampliacións e hoxe condenadas coñecían as circunstancias das que deriva a nulidade e tiñan coñecemento pleno da ilicitude da mesma e da ausencia dos elementos e requisitos necesarios para a eficacia dos devanditos negocios xurídicos», recolle a sentenza.

---

---

---