Botou a andar en Dumbría o Festival Escena Muller: «Un festival como este enriquece o territorio»

A quinta edición do Festival Escena Muller, FEM 2025, botou a andar este venres no albergue do Conco, Dumbría, e fíxoo coa apertura da exposición Coreografías do facer: imaxes do traballo feminino en Gustav Henningsen. Comeza así un programa que ata o día 26 acollerán tamén os concellos de Camariñas e Vimianzo. A mostra, exposta en Dumbría todo este mes e comisariada por Ana Estévez Lavandeira, do equipo do Museo do Pobo Galego, inclúe unha selección de fotografías históricas realizadas polo folclorista e antropólogo danés entre 1965 e 1968: nelas documenta o labor feminino en vilas e aldeas de Galicia. «Representa moita da filosofía coa que naceu este festival, a visibilidade das mulleres e a súa posta en valor a través da exposición cultural con impacto no territorio», apuntou a deputada provincial de Igualdade, Sol Agra. FEM, impulsado pola compañía aAntena, con Xosé Leis e Bernardino Martínez na dirección, conta co apoio da Deputación.

«Pretende que reflexionemos sobre como os coidados son tan importantes na nosa vida, e moitas veces esquecidos», afirmou Xosé Leis á vista das imaxes. FEM naceu desde ese lugar, lembrou: «Outorgar espazos nos que as mulleres poidan mostrar aquilo que din, cren e senten». «Un festival que nos chega moito por todo o que representa. Un proxecto cultural e social xa de referencia (...) Un festival igualitario e descentralizado», abundou Agra, que sinalou dous aspectos: o levarse a cabo en diferentes espazos, máis ou menos convencionais, e o traballar con mocidade, «imprescindible para un futuro máis concienciado». Agra agradeceu a aAntena a elección da Costa da Morte, territorio co que, dixo, ten moita implicación polo seu traballo en Muxía dende hai máis de 20 anos.

Máis que un ciclo de espectáculos, o FEM é «voz colectiva e valente», cultura máis alá das grandes urbes, en palabras de Sandra Insua, alcaldesa de Camariñas: «Un festival como este enriquece o territorio». Mónica Rodríguez, rexedora de Vimianzo, aludiu a unhas imaxes que poida que aínda estén na nosa memoria, «pero xa non se ven», de aí a importancia de rescatalas. Falou tamén da «diversidade» de actividades. «Todo o que se faga para resaltar o labor da muller rural nunca será suficiente. Eran e son fundamentais no día a día», afirmou do seu lado Raúl González, alcalde de Dumbría. Para mostra, súa nai, viúva con 30 anos e tres fillos, traballadora da mina de Varilongo, da baleeira de Caneliñas ou mesmo emigrante a Inglaterra.

---

---

---